Atube Basikumana Mulimo Bakkomene
1 Jesu wakati, muciindi cakubako kwakwe, ibunji bwabantu taakwe ‘nobayooziba’ mbubwenya mbocakabede akumazuba aa Nowa. (Mt. 24:37-39) Aboobo, kulalangilwa kuti ibunji bwabantu tabakoyooswiilila kumakani mabotu aa Bwami. Ncinzi cikonzya kutugwasya kuzumanana katukkomene notubeleka mumulimo wesu?—Int. 100:2.
2 Kusaanguna, tweelede kuziba kuti mulumbe wesu alimwi amulimo wesu wakukambauka zyoonse zyobile zizwa kuli Leza. Ikutayanda kuswiilila kuli koonse nkobakonzya kutondezya bantu mumulimo, nokuba kuti twasoleka mpotukonzya, ooko nkukaka Jehova. Ikwiibaluka kuti kusyomeka kwesu mubukambausi ulakukkomanina, ciyootugwasya ikuzumanana katukkomene alimwi akubaa lukkomano lwini-lwini katuli basikucita zyaambwa mujwi lya Leza.—Jak. 1:25.
3 Cabili, kucili bamwi ibayoozumina nzila njabambide Jehova yakufwutwida bantu. Nokuba kuti ibamwi inga kabatayandi, nkobali ibali mbuli mbelele ibeelede kubunganizigwa noliba lino notuli kumamanino kwini kwaciindi. Tweelede kuzumanana kukambauka, ikunjila “mumunzi umwi aumwi, nimuba mukanzi kamwi akamwi” ‘ikuyandaula muntu umwi wamumo uuyelede.’—Mt. 10:11-13.
4 Atuzumanane Kuzilanga Munzila Mbotu Zintu: Ibamwi batyompezegwaa makani aausisya acikombelo cakubeja. Ibambi ‘balikatede akumwaika’ abweende oobu bwazintu. (Mt. 9:36) Ibanji balakonzya kukatazigwa akaambo kakubula mulimo, makani akusilikwa alimwi akuliiba. Ikuti naa twacimvwisya kabotu eeci ciyootugwasya kukakatila mumulimo wesu. Amusoleke kutalisya mibandi iijatikizya makani ngobabikkila maanu kapati bantu bamucilawo cesu. Amubagwasye ikubona kuti Bwami bwa Leza bulikke mbobuyoomana mapenzi oonse aaya. Amubelesye Magwalo alimwi atwaambo tumbi tugaminide kuzwa mumabbuku kutegwa baswiililisye bantu makani mabotu.—Heb. 4:12.
5 Basikucita zyaambwa mujwi lya Leza bakkomene lyoonse inga balaibaluka kuti: “Lukondo lwa-Jehova ndolu[t]upa inguzu.” (Neh. 8:10) Taakwe ceelede kutulesya kubaa lukkomano. “Bantu bali mumo kuti beelede luumuno lwanu alube alimbabo. Pele kuti tabeelede, luumuno lwanu aluboole kulindinywe.” (Mt. 10:13) Jehova ulatuyungizizya lukondo alimwi anguzu eelyo notuliyumya cakukkazika moyo mumulimo wakwe uusetekene alimwi ulakulongezya kusyomeka kwesu.