Jehova Ulapa Nguzu
1 Ino mumubona buti mwaapostolo Paulo? Notubala bbuku lya Incito, tulabona mbwaakali munkutwe mumulimo wa Jehova. Ino Paulo wakacikonzya buti kuzuzikizya zyeezyo zyoonse nzyaakacita? Wakati: “Zintu zyoonse buyo ndazikonzya nkaambo kanguzu nzimpedwe kuli-Kristo.” (Flp. 4:13) Mbubonya buyo, andiswe tulakonzya kugwasigwaa nguzu nzyapa Jehova. Munzila nzi? Ikwiinda mukuzibelesya kabotu zipego zili cisambomwi nzyaatupa kutegwa tujane nguzu alimwi akuyumizigwa munzila yakumuuya.
2 Jwi lya Leza: Mbubwenya buyo mbotuyandika kulya cakulya kutegwa tube anguzu, tweelede kulya Jwi lya Leza kutegwa tube abuumi munzila yakumuuya. (Mt. 4:4) Ibbaibbele lilapa nguzu kutegwa tuzumanane munzila eeyi. Kutegwa tuzumanane abusungu alimwi akubotelwa akasimpe, tuyandika kubaa ciiyo cesu tobeni cigwasya alimwi akuzinzibala kuyeeya abuzuba ikuti kacikonzyeka.—Int. 1:2, 3.
3 Mupailo: Ncintu ciyandika kapati ikuba mulongwe wa Jehova, ikapati muciindi notuyandika lugwasyo lwaalubazu. Kwiinda mumuuya wakwe, ulapa nguzu ziyumya kuli baabo ibamukumbila mumupailo. (Lk. 11:13; Ef. 3:16) Magwalo atukulwaizya ‘kukakatila kukukomba.’ (Rom. 12:12) Sena mulacita oobo?
4 Imbungano: Ayalo miswaangano yambungano ilatupa nguzu alimwi ilatukulwaizya kubikkilizyaa kuyanzana kukondelezya nkotubaankuko abakwesu alimwi abacizi. (Heb. 10:24, 25) Ciindi notuli mumapenzi, balatukulwaizya alimwi akutugwasya caluyando.—Tus. 17:17; Muk. 4:10.
5 Mumulimo Wamumuunda: Ikutola lubazu lyoonse mumulimo kulatugwasya kubikkila maanu ku Bwami alimwi azilongezyo nzyobuyooleta. Tulakulwaizigwa ciindi notugwasya bamwi kwiiya makani aa Jehova. (Inc. 20:35) Tatukonzyi kulonga toonse akuya kubusena kuyandika lugwasyo naa ikutola lubazu mumulimo waciindi coonse, pele tulakonzya kutola lubazu lulaampindu mumbazu zimwi zyamulimo.—Heb. 6:10-12.
6 Balangizi Banakristo: Tulagwasigwaa kukulwaizyigwa alimwi alugwasyo ndobatupa baalu. Jehova wababikka kutegwa beembele butanga mbobapedwe. (1 Pet. 5:2) Balangizi beendeenda balaziyumya-yumya mbungano mobabelekela mbubwenya buyo mbuli bwakacita Paulo kuciindi cakwe.—Rom. 1:11, 12.
7 Zikozyanyo Zyabaabo Basyomeka: Cilayumya-yumya ikulanga-langa zikozyanyo zikulwaizya zyababelesima ibasyomeka bakuciindi cansiku alimwi amazubaano. (Heb. 12:1) Ciindi nomuyanda kuyumizigwa, ino mulekela nzi kwaabala makani aabuumi bwabamwi aakulwaizya aali mumamagazini eesu, ayaayo aajanika mu Yearbook, antela makani aakkomanisya aajatikizya milimo ya Bakamboni ba Jehova bamazubaano mubbuku lya Proclaimers?
8 Umwi mukwesu ulaamyaka yakuzyalwa iili kuma 90, wakakatambula kasimpe naakacili mwana. Kacili mukubusi, lusyomo lwakwe lwakasunkwa. Cakusaanguna, bamwi ibakali kuyanzanaa mbungano bakiisiya mbunga ya Jehova. Alimwi kwakali mulimo wakuŋandaa ŋanda walo iwakamuyumina kapati. Nokuba boobo, lyoonse wakali kulangila kuli Jehova muzintu zyoonse. Tiikwakainda ciindi wakatalika kuukkomanina mulimo. Ino uli buti sunu? Nokuba kuti ulaciswa-ciswa, ngumwi wamukwasyi wa Beteli yaku Brooklyn alimwi kali umwi wamu Kabunga Keendelezya. Kunyina nausa pe akaambo kakuti wakakakatila kumbunga ya Jehova.
9 Mucizi umwi uuli mumukwasyi wa Beteli yaku Britain wakabbapatizigwa naakali amyaka yakuzyalwa iili 13. Mwaka wakatobela wakatalika kubeleka mulimo wabupainiya antoomwe amupati wakwe musankwa naa munyinanduni, mpoonya nokwainda mwaka omwe bausyi bakatolwa kuntolongo akaambo kakukaka kutola lubazu mu Nkondo Yanyika Yabili. Mucizi ooyu wakazumanana kulanga kuli Jehova kuti amupe nguzu, aboobo wakazumanana kubelekela Leza wakasimpe. Mukuya kwaciindi, wakakwatwa kumukwesu uusyomeka alimwi bakazumanana kucita kuyanda kwa Jehova antoomwe. Nokwainda myaka iili 35 kuzwa nobakakwatana, mulumaakwe wakafwa cakutaciswa. Mukaintu alimwi wakagwasigwa anguzu zya Jehova akuzumanana kumubelekela kusikila sunu, kajisi bulangizi bwakuyoobeleka kusikila kukabe kutamani kali umwi wamukwasyi wa Jehova waanyika yoonse mbwiizulwa.
10 Jehova ulabagwasya akubapa nguzu babelesi bakwe basyomeka. “Ulakatalusya bakateede, abaabo batakwe inguzu ulabayumya.” Tulakonzya kuzijana nguzu eezi ziteeli kwiinda mukubikkila maanu kuzipego izili cisambomwe zyaambwa atalaawa. Amuzibe kuti: “Abo babikide myoyo yabo kuli-Jehova balabukulusya inguzu zyabo, . . . balazuzaana akutakataala, balaya bweenda cakutawizuka.” (Is. 40:29-31) Paulo wakasyoma muli Jehova camoyo woonse kuti amupe nguzu, andiswe tweelede kucita mbubonya oobo.