Amulangile Jehova Kuti Amuyumye
1 Kuli twaambo tunji kapati ncotweelede kumusyoma Jehova. Mulimo wakukambauka makani mabotu “munyika yoonse” uyandika busicamba. (Mt. 24:14) Kanjikanji tulalwisyanyaa kutalondoka kwesu. (Rom. 7:21-23) Kunze lyaboobo, tujisi “inkondo njitulwa . . . njakulwana . . . [azilenge zilaanguzu kapati kwiinda zyabuntunsi] abami abasinguzu bamumudima waansi ano.” (Ef. 6:11, 12) Masimpe, tuyandika lugwasyo. Ino mbuti mbotukonzya kuyumizigwaa Jehova?
2 Kwiinda Mumupailo: Jehova ulilibambilide ikupa muuya wakwe uusalala ulaanguzu kapati kubabelesi bakwe aabo ibamukumbila. (Lk. 11:13) Sena kuli nomulimvwa kuti tamukonzyi kukambauka kuŋandaa ŋanda, mumugwagwa naa kwiinda aluwaile? Sena muli bakandu mukukambauka kwamukwiizya? Sena kusulaika nkobacita bantu mucilawo kulamutyompya? Ino inga mwacita nzi ciindi nomusinikizigwa kuubya-ubya lusyomo ndomujisi naa kucileka kusyomeka? Amusyome Jehova. Amumukumbile kuti amuyumye.—Flp. 4:13.
3 Kwiinda Muciiyo Cesu Tobeni: Mbubwenya mbotujana nguzu kwiinda muzyakulya zyakumubili, tulayumizigwa munzila yakumuuya kwiinda mukuzumanana kulya Jwi lya Leza lyoonse alimwi amumabbuku aa “muzike musyomesi uucenjede.” (Mt. 4:4; 24:45) Imwaalumi umwi wazina lya Stanley Jones naakabuzigwa icakamugwasya kuliyumya mumyaka njaakali muntolongo alikke mucisi ca China katakwe a Bbaibbele, wakati: “Tulakonzya kwiima nji mulusyomo. Pele tuyandika kusaanguna kuliyiisya tobeni. Tatukonzyi kuliyumya ikuti katutaliyiisyi tobeni.”
4 Kwiinda Mukujanika Kumiswaangano: Kumuswaangano wa Bunakristo mumwaanda wamyaka wakusaanguna, Juda alimwi a Sila “bakalaya babunyina majwi manjimanji, [aku]bayumya.” (Inc. 15:32) Ncimwi buyo asunu, makani ngotumvwa kumiswaangano alatuyumya ikumulumba Jehova akutuyumya mulusyomo lwesu alimwi alatukulwaizya ikuzumanana mumulimo wesu. Miswaangano ilatugwasya ikuyanzana lyoonse abeenzuma “mbutubeleka abo milimo ya-Bwami bwa-Leza” balo ‘ibatuyumya.’—Kol. 4:11.
5 Tuyandika lugwasyo ‘kumazuba aano aakatazya.’ (2 Tim. 3:1) Kulibaabo ibayumizigwaa Jehova, tusyomezyegwa kuti: “Balaya butanta amababa mbuli basikwaze, balazuzaana akutakataala, balaya bweenda cakutawizuka.”—Is. 40:31.