Amuzumanane Kuba Alukkomano Mubukambausi
1 Ikutola lubazu mukukambauka makani mabotu kulakkomanisya—sena andinywe mulakukkomanina? Ikuti twatacenjela, ibantu babyaabi anyika batuzingulukide balakonzya kututyompya akuleka kukambauka, alimwi akutaba alukkomano. Kubelekela mucilawo citajisi bantu bautambula mulumbe, cilakonzya kututyompya acalo. Ino nintaamu zili buti zibeleka nzyotukonzya kubweza kutegwa tuzumanane kuba alukkomano mubukambausi?
2 Amube Akulangila Kuli Kabotu: Ikuba bantu balangila bubotu masimpe cilagwasya. Inzila yomwe njomukonzya kubelesya kutegwa kamutatyompyi, nkuzinzibala kuyeeya mulimo uutaliboteli ngotupedwe wakuba “basimilimonyina Leza.” (1 Kor. 3:9) Jesu awalo ulaandiswe mukumaniizya mulimo ooyu. (Mt. 28:20) Alimwi ulatugwasya kwiinda mukututumina nkamu yabangelo. (Mt. 13:41,49) Tulakonzya kusinizya kuti kusoleka kwesu nkotucita kweendelezyegwa a Leza. (Ciy. 14:6,7) Kufwumbwa bantu mbobakonzya kuubona mulimo wesu, kusoleka kwesu kulatambulwa kujulu!
3 Kamulibambila Kabotu: Kulibambila kabotu kulagwasya mukumuletela lukkomano. Kulibambila kuya mumuunda, taweelede kumubeda mulimo mupati. Citola buyo maminiti masyoonto kulibambila zyakwaamba kujatikizya mamagazini mapya naa bbuku limbi buyo limwaigwa mumwezi ooyo. Amusale citondezyo kuzwa kumutwe wakuti, “Nzyotweelede Kwaamba Kujatikizya Mamagazini” mu Mulimo Wesu Wabwami. Amubone kupepa lyamukati lyamu January 2002 kumutwe wakuti, “Twaambo Tugwasya Kutalisya Mibandi,” ambweni inga mwalanga mubbuku lya Kukambitsirana kutegwa mujane intalisyo iibeleka kabotu. Ikuti naa mwakatazyigwa kumakani ngobaamba balaamunzi, amulibambile kabotu kutegwa mukacikonzye kwiingula mibuzyo alimwi akubagamika kucibalo zikondelezya. Ibbuku lya Kukambitsirana lilagwasya kucita boobu. Kwiinda mukubelesya zibelesyo eezyi zigwasya, tunakuli bantu bakulwaide mubukambausi.
4 Kamupaila Cakusinizya: Mupailo ulayandika kutegwa muzumanane kukkomana. Mbwaanga mulimo ngotucita ngwa Leza, lyoonse tweelede kuti katulomba kulinguwe kutegwa atupe muuya umwi wamucelo walo uuli ndukondo. (Gal. 5:22) Jehova uyakutupa nguzu kutegwa tuzumanane kukambauka. (Flp. 4:13) Kupailila mulimo wesu kulakonzya kutugwasya kubona zintu munzila yeelede iciindi notwaambilwa makani aatakondelezyi. (Inc. 13:52; 1 Pet. 4:13, 14) Ikuti naa mwatalika kuyoowa, mupailo ulakonzya kumugwasya kuba basicamba alimwi bakkomenyi.—Inc. 4:31.
5 Amujane Ciindi Cakukambauka: Inzya, mulimo wesu ulainda kunonezya iciindi notujana bantu akubakambaukila. Ikucinca mulongo wanu wakuŋanda aŋanda akuubikka aciindi cimwi, ambweni buya kumazuba naa kulubundubundu, ndiza mulakonzya kuzwidilila. Mulakonzya kuyaanya bantu ciindi coonse nomweenda munzila, nomuya kukuula zintu, nomukkwela bbaasi naa nomweenda-enda mumasena akupumunina. Ino mulekela nzi ma kulibambila makani antalisyo alimwi cabusongo akutalisya mubandi kulibaabo babikkila maano kuli nzyomwaamba? Ambweni inga mwaunka nkubabelekela naa kuzikolo kwalo nkomukonzya kujana bakubandika limwi abuzuba. Mulakonzya kuba acoolwe cakupa bumboni kwiinda mukwaamba cibalo cigaminide a Lugwalo calo cikonzya kubusya luyandisyo. Inzila zibeleka kabotu zilajanwa mupepa lyamukati lya Mulimo Wesu Wabwami wa January 2002. Kufwumbwa kusoleka kuli koonse nkotukonzya kucita kuli boobu, kulakonzya kutugwasya kuzumanana kukambauka calukkomano.
6 Mbwaanga lukkomano lulatugwasya kuliyumya, elo kaka cilayandika kuzumanana kuba andulo! Kwiinda mukucita boobo, tuya kujana bulumbu butaambiki ciindi mulimo ooyu uutakaindulukwi kabili waakumana. Ikuti twacita boobo cilakonzya kutupa kuzumanana kukambauka calukkomano.—Mt. 25:21.