Lusyomo Lwesu Lutupa Kucita Milimo Mibotu
1 Lusyomo lwakapa kuti Nowa, Musa alimwi Rahabu babweze ntaamu. Nowa wakapanga bwato. Musa wakabukaka buumi bubotu bwakaindi buyo kaniini mumunzi wa Farao. Rahabu wakasisa basikutwela, mpoonya wakaaccilila malailile aabo akufwutula bamuŋanda yakwe boonse. (Heb. 11:7, 24-26, 31) Ino mmilimo nzi mibotu lusyomo lwesu ncolutukulwaizya kucita mazubaano?
2 Ikucita Bukamboni: Lusyomo ndolutupa kukanana kujatikizya Leza wesu mubotu alimwi abubambe bwakwe bwakuba alukkomano kukabe kutamani. (2 Kor. 4:13) Muziindi zimwi, tulawayawaya kukambauka. Pele ciindi ‘notubikka Jehova kumpela kuzyintu zyoonse nzyotucita, tulayumizyigwa alimwi tulaleka kuyoowa. (Int. 16:8) Eelyo lusyomo lwesu lutupa kuti katucikonzya kubakambaukila bamukowa wesu, basimukoboma, mbotubeleka limwi alimwi abamwi buyo kufwumbwa notujana ciindi.—Rom. 1:14-16.
3 Ikuswaangana: Ikujanika lyoonse kumiswaangano, nimbazu iimwi yamilimo mibotu iicitwa akaambo kalusyomo. Munzila nzi? Iciindi notujanika kumuswaangano ya Bunakristo lyoonse, ncitondezyo cakuti tulisinizyide kuti Jesu nkwali akati kesu kwiinda mumuuya uusalala wa Leza. (Mt. 18:20) Tulakabona kaambo ncotweelede ‘kuswiilila Muuya ncowaambila imbungano.’ (Ciy. 3:6) Tulaaccilila malailile ngotupegwa akaambo kakuti meso eesu aalusyomo alabona kuti uutuyiisya Mwiyi wesu Mupati Jehova.—Is. 30:20.
4 Kusala Kwesu: Ikubaa lusyomo muzintu nzyotutaboni aameso, kutupa kubikka zintu zyamuuya mubusena butaanzi mubuumi bwesu. (Heb. 11:1) Kanjikanji eeci caamba kubikka ambali zintu zyakumubili. Mucikozyanyo, imwaalu umwi wakakaka kusumpulwa akaambo kakuti inga camupa kuti katajaniki kumuswaangano, kutakkala amukwasyi wakwe alimwi akuleka mulimo wakwe wabupainiya. Aboobo, andiswe mbuli cilengwa atusyome Bbaibbele ncolitusyomezya akuti Jehova uya kubapa ziyandika aabo ‘cakusaanguna balangaula Bwami alimwi abululami bwakwe.’—Mt. 6:33.
5 Ooku kweendelezyegwa alusyomo mubuumi bwesu balakubona bantu. Masimpe, lusyomo lwesu lulabonwa nyika yoonse. (Rom. 1:8) Aboobo, toonse atucite milimo yesu mibotu calo citondezya kuti lusyomo lwesu lulapona.—Jak. 2:26.