Amubabikkile Maano “Bamucaala”
1 Jehova “[ngo]wisaabo bamucaala.” (Int. 68:5) Ikubikkila kwakwe maano kubukkale bwabo kulalibonya mumulawo ooyu ngwaakapa kuciinga cabana Israyeli bansiku wakuti: “Mutapenzyi mukamufu nanka mucaala naba umwi. Na mwabapenzya, alimwi na bakwiilila ndime, ncobeni ndamvwa kukwiila kwabo.” (Kul. 22:22, 23) Alimwi kuli bubambe bwakabikkidwe mu Mulawo wa Leza ibwakugwasya bantu bali boobo kuzintu zyakumubili nzyobakali kuyandika. (Dt. 24:19-21) Mububambe bwa Banakristo, bakombi bakasimpe balaililwa kuti ‘kababalanganya bamucaala abamukabafwu mumapenzi aabo.’ (Jak. 1:27) Ino mbuti mbotunga twamwiiya Jehova mukubabikkila maano aabo ibali mukukomenena mumikwasyi yamuzyali uuli alikke naa oomo mobaandeene bukombi?
2 Lwiiyo Lwakumuuya: Ikuti kamuli bazyali bali balikke naa mujisi mweenzyinyoko wamulukwatano uutasyomi, cilakonzya kumuyumina kusololela ciiyo caaŋanda ca Bbaibbele lyoonse kubana banu. Pele, iciiyo ca Bbaibbele icicitwa lyoonse alimwi cizuzikizya zintu nzyobayandika banamukwasyi cilayandika kapati kutegwa bakomene munzila mbotu alimwi kabasimide. (Tus. 22:6) Alimwi kulayandika kubandika ambabo lyoonse zintu zyakumuuya. (Dt. 6:6-9) Zimwi ziindi, mulakonzya kuboneka kutyompokelwa, nokuba boobo mutaleki pe. Amulombe nguzu alimwi abusolozi kuzwa kuli Jehova mbomuya buzumanana ‘kubalela bana banu mulwiiyo lwa Mwami Jehova amumilazyo yakwe.’—Ef. 6:4.
3 Ikuti kamuyanda lugwasyo kujatikizya mbomunga mwazuzikizya mikuli yanu yamu Magwalo, amubazyibye baalu. Balakonzya kumupa nzila nzyomunga mwabelesya naa kumugwasya kubaa mulongo mubotu wazintu zyakumuuya zyakucita mumukwasyi wanu.
4 Ibamwi Mbobanga Bagwasya: Mumwaanda wamyaka wakusaanguna, Timoteo wakaba mubelesi wa Jehova musungu nokuba kuti wakakomenena mumukwasyi wakaandeene mubukombi. Icakutadooneka, ikusoleka canguzu nkobakacita banyina alimwi abakaapanyina mukumuyiisya kasimpe naakali mwana kwakamugwasya kapati. (Inc. 16:1, 2; 2 Tim. 1:5; 3:15) Nokuba boobo, awalo wakagwasyigwa kwiinda mukuyanzanaa Banakristo bamwi kubikkilizyaa mwaapostolo Paulo ooyo wakali kwaamba Timoteo kuti wakali ‘mwaanaakwe muyandisi alimwi musyomesi mu Mwami.’—1 Kor. 4:17.
5 Ncimwi buyo asunu, cilagwasya kapati kaka eelyo bakwesu alimwi abacizi basimide munzila yakumuuya nobababikkila maano bamucaala mumbungano! Sena mulilizi zina lyamwana umwi aumwi uli boobo? Sena mulabandika ambabo lyamiswaangano ya Bunakristo alimwi amuziindi zimwi? Amubalombe kumusangana mumulimo wamumuunda. Ambweni zimwi ziindi mulakonzya kubatamba antoomwe abazyali babo ibali balikke naa ibakwetwe kumuntu uutasyomi kuciiyo camukwasyi wanu mane akubabikkilizya mububambe bwakusobana kuli kabotu. Ikuti naa kamuli mulongwe kubana aaba, banooangulukide kwiiya citondezyo canu alimwi akuzitobela nzyomubakulwaizya.—Flp. 2:4.
6 Jehova ulababikkila maano kapati bamucaala alimwi ulakulongezya kusoleka kwesu nkotucita ikutegwa tubagwasye kutambula kasimpe, kukayandisya alimwi akukatobela mubukkale bwabo lyoonse. Ibunji bwabaabo ibakakomenena mumikwasyi yamuzyali uuli alikke naa yaandeene bukombi bakakulwaizyigwa munzila eeyo, aboobo lino balabeleka cakusyomeka kabali bapainiya, bakutausi, baalu, balangizi beendeenda, bamisyinali naa kabali bamwi bacibeela camukwasyi wa Beteli. Toonse atulange-lange nzila mbotukonzya ‘kujalula myoyo yesu’ mukubatondezya luyando bamucaala mukwiiya Taateesu wakujulu.—2 Kor. 6:11-13.