Amwaambilizye Mulumbe wa Bwami
1 ‘Ndileelede kukambauka Makani Mabotu aa Bwami bwa Leza, nkaambo ncenciceeco ncendakatuminwa.’ (Lk. 4:43) Kwiinda mumajwi aayo, Jesu wakaamba cakusalazya mutwe wamakani wamulimo wakwe—Bwami bwa Leza. Awalo mulumbe ngotukambauka mazubaano uuyeeme a Bwami, kweelanaa mbokwakasinsimwa kubbuku lya Matayo 24:14 kuti: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” Ino makani nzi aakasimpe aajatikizya Bwami bwa Leza bantu ngobeelede kumvwa?
2 Bwami bwa Leza buleendelezya kujulu alimwi ino-ino buyoogwisya mfwulumende zyabantu zyoonse. Diabolosi wakatandwa kale kujulu alimwi tuli mumazuba aakumamanino aabweende bwazintu oobu bubyaabi. (Ciy. 12:10, 12) Bweende bwazintu bubyaabi bwa Saatani buyoonyonyoonwa cakumaninina, pele Bwami bwa Leza kunyina nobuyoozungaanizyigwa pe. Bunooliko mane kukabe kutamani.—Dan. 2:44; Heb. 12:28.
3 Bwami buyoozuzikizya zintu zibotu nzyobalombozya bantu boonse ibamvwa. Buyoomanizya mapenzi aletwa ankondo, lunya, kudyaamininwa alimwi abucete. (Int. 46:8, 9; 72:12-14) Bantu boonse banoojisi zyakulya zinji. (Int. 72:16; Is. 25:6) Malwazi alimwi abulema zinooli zintu zyakaindi. (Is. 33:24; 35:5, 6) Mbobayaa bulondoka bantu, nyika iyoopilusyigwa kuba paradaiso alimwi bantu bayookkala antoomwe muluumuno.—Is. 11:6-9.
4 Kwiinda mubukkale bwesu, lino tulatondezya kuti tulayandisya kuba balelwa ba Bwami bwa Leza. Bukkale bwesu boonse bweelede kweendelezyegwa amulumbe wa Bwami, kubikkilizya ambaakani nzyotujisi mubuumi alimwi azintu nzyotubikkide kumbele. Mucikozyanyo, nokuba kuti tulijisi mukuli wakubayandauda nzyobayandika banamukwasyi wesu, izintu zyakumubili tazyeelede kunyonganya mulimo wa Bwami. (Mt. 13:22; 1 Tim. 5:8) Muciindi caboobo, tweelede kutobela lulayo lwa Jesu lwakuti: “Amusaangune kuyandaula Bwami bwa-Leza abululami bwakwe, elyo zintu ezi zyoonse [ziyandika zyakumubili] mulaziyungizizigwa azyalo.”—Mt. 6:33.
5 Cilayandika kapati kuti bantu bamvwe mulumbe wa Bwami alimwi akucita ziyandika eelyo nokucili ciindi. Atubagwasye kucita boobo kwiinda ‘mukubakombelezya kujatikizya Bwami bwa Leza.’—Inc. 19:8.