Ikuzuzikizya Cikonke naa Cipangano Cesu Cakulyaaba
1 Kufwumbwa naa mwakabbapatizyigwa ino-ino antela nkaindi, mweelede kuti muciyeeyede kujatikizya ntaamo eeyo iiyandika kapati njomwakabweza mubuumi bwanu. Ikubbapatizyigwa taali ngamamanino pe, pele mmatalikilo buyo aamulimo weelede kucitwa mubuumi boonse bwabantu balyaabide. (1 Joh. 2:17) Ino ncinzi cijatikizyidwe mukuzuzikizya cikonke cesu cakulyaaba?
2 Amutobele Cikozyanyo ca Kristo: Mbwaakabbapatizyigwa buyo, Jesu ‘wakatalika mulimo wakwe’ wakwaambilizya “Makani Mabotu aa-Bwami bwa-Leza.” (Lk. 3:23; 4:43) Mbubwenya buyo, twamana kutondezya kulyaaba kwesu kuli Jehova kwiinda mukubbapatizyigwa, tulaba basimilimo bamakani mabotu ibasalidwe. Nokuba kuti tuyanda ciindi cinji alimwi akusolekesya kutegwa tukonzye kujana ziyandika zyakumubili, imulimo wesu mupati mmulimo wa Bunakristo. (Mt. 6:33) Muciindi cakuyandisya kujana lubono naa mpuwo, aabo balyaabide kuli Leza balayandisya ‘kulemeka mulimo wabo’ kweelana ambuli bwakacita mwaapostolo Paulo. (Rom. 11:13) Sena mulacikkomanina coolwe caalubazu cakubelekela Jehova alimwi akucita mbuli mbomukonzya ikutegwa mulemeke mulimo wakwe ngomubeleka?
3 Kweelana ambuli bwakacita Jesu, aswebo tweelede ‘kumukazya Diabolosi.’ (Jak. 4:7) Saatani wakamusunka Jesu ciindi Naakamana kubbapatizyigwa, asunu ncimwi buyo ulibafwungilide kapati babelesi ba Jehova balyaabide. (Lk. 4:1-13) Akaambo kakuti tuli munyika yeendelezyegwa a Saatani, tweelede kuba bantu balilemeka alimwi batantamuka cintu cili coonse icikonzya kutunyonganya mumizeezo yesu alimwi akoongelezya moyo wesu. (Tus. 4:23; Mt. 5:29, 30) Banakristo balaililwa kuti tabeelede “kwaabilwa kuntafule ya-Mwami akuntafule yabadaimona.” (1 Kor. 10:21) Eeci cipandulula kuti tweelede kuzitantamuka zyakulikondelezya zitali kabotu, kuyanzana abantu babyaabi alimwi antenda zikonzya kuboola akaambo kakubelesya Internet munzila iiteelede. Alimwi cilayandika kuti twaatantamuke mabbuku aabasiluleyo. Ikuzicenjelela zintu eezi alimwi anzila zimwi zyabucenjezu zya Saatani, kuyootugwasya kuzuzikizya cikonke cesu cakulyaaba.
4 Amububelesye Bubambe bwa Jehova: Ikutegwa atugwasye kuzuzikizya cikonke cesu cakulyaaba, Jehova watugwasya kwiinda mu Jwi lyakwe alimwi ambungano ya Bunakristo. Ikubala Bbaibbele alimwi akupaila kuli Jehova acibe cilengwa canu buya cabuzubaa buzuba. (Jos. 1:8; 1 Tes. 5:17) Amwiikkomanine miswaangano yambungano. (Int. 122:1) Kamuyanzana abantu bayoowa Jehova alimwi akubamba malailile aakwe.—Int. 119:63.
5 Kwiinda mukugwasyilizyigwa a Leza, mulakonzya kuzuzikizya cikonke cakulyaaba kwanu kuli Jehova, eelyo akujana lukkomano mukubelekela nguwe lyoonse.—Int. 22:26, 27; Flp. 4:13.