Impindu ya Busongo bwa Leza Yiinda Zyoonse
1 Ibantu bamwi bayeeya kuti Bakamboni ba Jehova beelede kubikkila maanu kapati kukugwasilizya kumanizya mapenzi aakatazya bantu sunu. Ibantu bali boobo tabaiboni mpindu yamulimo wesu wakuyiisya Bbaibbele iyiinda zyoonse. Cili buyo mbubwenya mwaapostolo Paulo mbwaakalemba kuti: “Kulibaabo bali mukunyonyooka makani [aacisamu cakupenzezya, NW] mbufubafuba buyo, anukuti kulindiswe nituli mukufutuka ninguzu zya-Leza.” (1 Kor. 1:18) Ee, tulizyi kuti imulimo wa Bunakristo mmulimo uuyandika kwiinda yoonse uucitwa anyika sunu.
2 Ibuumi Bubotu Lino: Ikusoleka kwabantunsi ikumanizya mapenzi aajisi bantu kwagwasya buyo asyoonto. Imilawo kunyina noyalesya kuyaambele kwamilandu. Izizuminano zyaluumuno alimwi ampi zigwasilizya kubamba luumuno kunyina nozyamanizya nkondo pe. Imilimo yakusumpula bukkale bwabantu yakakilwa kumanizya bucete. (Int. 146:3, 4; Jer. 8:9) Mukwiimpana, imulumbe wa Bwami wasandula bukkale bwatuulunzuma twabantu kwiinda mukubagwasya kusama buntu bupya mbwakkomanina Leza. (Rom. 12:2; Kol. 3:9, 10) Mukucita boobo, bapona buumi busumpukide noliba lino.—1 Tim. 4:8.
3 Ibukkale Bwakumbele Bubotu: Kunze lyakutugwasya kulanganya mapenzi aamubuumi ngotujisi lino, ibusongo bwa Leza butugwasya kulibambila kabotu kujatikizya bukkale bwakumbele. (Int. 119:105) Bulatukwabilila kukucita zintu zitagwasyi mukusoleka kucinca bweende obu bwazintu. (Muk. 1:15; Rom. 8:20) Tulalumba kapati kaka kuti tatuli mukunyonyoona maumi eesu mukusungwaalila zintu zitakwe mpindu! Muciindi caboobo, tubikkila maanu kucisyomezyo ca Jehova citadoonekwi ca “ijulu ipya anyika impya” oomo munooli bululami. Ibuzuba bwa Jehova bwalubeta bwaakusika, ciyoosalala kuti aabo ibakasyoma busongo bwa Leza bakasala camaanu.—2 Pet. 3:10-13; Int. 37:34.
4 Nokuba kuti ibusongo bwa Leza inga bwaboneka kuti tabugwasyi kuli baabo ibalobelede “[mu]busongo bwaciindi ecino,” mubwini eeyi nenzila ilikke iigwasya njotweelede kutobela. (1 Kor. 1:21; 2:6-8) Aboobo, tulazumanana kwaambilizya munyika yoonse imulumbe uuzwa kuli Leza ooyo “musongo alike.”—Rom. 16:27.