Ikusaala Kwabasinkondo Basimbizi Ikumujatikizya
1, 2. Mbuti babelesi ba Leza sunu mbobajatikizyidwe mukuzuzikizyigwa kwacilengaano cabusinsimi cilembedwe ku Ciyubunuzyo 9:13-19?
1 “Angelo wamusanu aumwi wakalizya mweembo.” Kuzwa waawo, “mweelwe wabasinkondo basimbizi” iwakali “myaanda yobile yazyuulu zyazyuulu” bakalimvwisya mbuli muzuzumo wamvwula. Aaba tabali basinkondo babuyo-buyo pe. “Mitwe yambizi yakali mbuli mitwe yabalavu.” Mukanwa mwazyo mwakali kuzwa mulilo, busi asulufa alimwi “micila yazyo ili mbuli inzoka.” Eeci cikozyano cabasinkondo basimbizi cakasaala cakunyonyoona. (Ciy. 9:13-19) Sena mulizyi mbomujatikizyidwe mukuzuzikizyigwa kwacilengaano eeci cabusinsimi?
2 Ibananike basyeede alimwi abeenzinyina ibambelele zimwi, caantoomwe baambilizya mbeta zya Leza. Akaambo kaceeci, bamumanizya kumusinsa Kristendomu aciimo ncabede cakufwa kumuuya. Atulange-lange twaambo tobile twacilengaano cabusinsimi eeco caamba mulimo wababelesi ba Leza ncowazwidilila.
3. Ino nkuyiisyigwa kuli buti nkomwayiisyigwa kutegwa mukanane mulumbe wa Leza cakuzwidilila?
3 Bayiisyidwe Alimwi Ibalibambide Kwaambilizya Mulumbe wa Leza: Ikwiinda mu Cikolo Camulimo Weendelezyegwa a Leza alimwi amiswaangano imwi yambungano, ibabelesi ba Leza bayiisyigwa kukanana mulumbe wa Leza canguzu. Mukwiiya Jesu alimwi abasikwiiya bakwe, balaunka kuyandaula baabo beelela alimwi akukambauka kuli koonse bantu nkobajanika. (Mt. 10:11; Mk. 1:16; Lk. 4:15; Inc. 20:18-20) Elo inzila eeyi yakubelesya Bbaibbele mubukambausi yazwidilila kaka!
4. Ino nzibelesyo nzi ziliko kuli basikumwaya banji kutegwa batole lubazu mumulimo wabo?
4 Zyuulu-zyuulu zyatuulunzuma twama Bbaibbele, mabbuku, mabroshuwa alimwi amamagazini amwaigwa ababelesi Banakristo nobabeleka mulimo wa Leza wakukambauka ngobakatumwa. Aaya mabbuku alamwaigwa mumilaka iitandila ku 400, kaakanana zibalo ziindene-indene alimwi izikonzya kukkomaninwa abantu bayindene-indene. Sena mulaabelesya cakuzwidilila mabbuku aaya?
5, 6. Ino ncinzi citondezya kuti bantu ba Jehova balagwasyigwa a Leza?
5 Ilugwasyo a Busolozi Bwakujulu: Alimwi icilengaano cabusinsimi cilacisalazya kuti imulimo wiimininwa akusaala kwabasinkondo basimbizi ugwasyilizyigwa a Leza. (Ciy. 9:13-15) Imulimo wabukambausi wanyika yoonse uuli mukucitwa tuucitwi mubusongo bwabantu naa inguzu, pele nkwiinda mumuuya wa Leza. (Zek. 4:6) Jehova ubelesya bangelo ikweendelezya mulimo wakwe. (Ciy. 14:6) Aboobo antoomwe akusoleka kwa Bakamboni bakwe bantunsi, Jehova wapa lugwasyo kuzwa kujulu kugwasyilizya kubakwelela kulinguwe bantu.—Joh. 6:45, 65.
6 Akaambo kakuti baliyiisyidwe, balilibambide kwaambilizya mulumbe wa Leza alimwi balabeleka kabasololelwa amungelo, kunyina uunga wabakasya ibantu ba Jehova. Atuzumanane kucita lubazu lwesu mukuzuzikizyigwa kwacilengaano cabusinsimi eeci icikkomanisya.