‘Amujalule Myoyo Yanu’
1. Ino mmukuli nzi aumwi wesu ngwajisi?
1 Mubunyina bwa Bunakristo, aumwi wesu ulijisi mukuli wakucita kuti kube muuya mubotu mumbungano. (1 Pet. 1:22; 2:17) Muuya mubotu uuli boobo ulaba ‘notujalula myoyo yesu’ ciindi notuyandana umwi aumwi. (2 Kor. 6:12, 13) Ino nkaambo nzi ncociyandika kubazyiba kabotu bakwesu abacizyi?
2. Ino nkaambo nzi ncociyandika kuba abalongwe basyomima?
2 Zilongwe Zilayuma: Mbotuyaabuzyibana kabotu abasyomima, tuyoolubona lusyomo lwabo, lukakatilo alimwi abube bubotu bumbi mbobajisi. Kulezya kwabo tatukakuboni kuti ncintu cipati alimwi cilongwe cesu ciyooyuma. Twazyibana kabotu, tuyooba muciimo cibotu cakuyakana alimwi akugwasyanya. (1 Tes. 5:11) Tuyooba ‘basikuumbulizya’ bamwi ikuti bakutantamuke kuyunga kwanyika eeyi ya Saatani. (Kol. 4:11) Akaambo kamazuba aaya aamamanino aazwide mapenzi, elo kaka tulikkomene kuba abalongwe babotu akati kabantu ba Jehova!—Tus. 18:24.
3. Ino mbuti mbotunga twaba basikuumbulizya kubantu?
3 Balongwe beni-beni balakonzya kutukulwaizya alimwi akutuumbulizya notuli mumasunko mapati. (Tus. 17:17) Mukaintu umwi Munakristo iwakali kulwana penzi lyakulimvwa kubula mpindu ulayeeya kuti: “Kwakali balongwe ibakali kwaamba zintu zikulwaizya kujatikizya ndime ikundigwasya kulwana penzi lyakuba amizeezo iitaluzi njondakajisi.” Ibalongwe bali boobo ncilongezyo kuzwa kuli Jehova.—Tus. 27:9.
4. Ino mbuti mbotunga twabazyiba kabotu bambi mumbungano?
4 Amube Aluyandisisyo Kubantu: Mbuti mbotunga twajalula myoyo yesu mukuyanda basyomima? Kunze lyakwaanzya bamwi kumiswaangano ya Bunakristo, amusolekesye kubanjizya mumubandi uuyaka. Kakunyina kubabuzyisisya twaambo twamaseseke, amubabikkile maano. (Flp. 2:4; 1 Pet. 4:15) Inzila imwi mbotunga twabayanda bambi nkwiinda mukubatamba kucakulya. (Lk. 14:12-14) Antela mulakonzya kucita bubambe kuyoobeleka ambabo mumulimo wamumuunda. (Lk. 10:1) Mbotuyaabuzumanana kubweza ntaamu yakubazyiba kabotu bakwesu, tupa kuti lukamantano mumbungano luzumanane.—Kol. 3:14.
5. Ino ninzila nzi imwi mbotunga twapanga balongwe besu banji?
5 Sena tulijisi cilengwa cakusala balongwe besu akati kamisela yesu naa aabo ibayanda nzyotuyanda? Tutalekeli zintu zili boobo kutweendelezya notupanga balongwe mumbungano. Davida a Jonatani alimwi Rute a Naomi bakapanga cilongwe cini-cini nokuba kuti bakaliindene misela alimwi amasena nkobakakomenena. (Rut. 4:15; 1 Sam. 18:1) Sena inga mwapanga balongwe banji? Ikucita boobo kulakonzya kumuletela zilongezyo zinji.
6. Ino zilongezyo nzi zimwi ziboola akaambo kakujalula myoyo mukubayanda bakwesu?
6 Ikwiinda mukujalula moyo mukuyanda bambi, tulakulwaizyanya alimwi akupa kuti kube luumuno mumbungano. Kuyungizya waawo, Jehova kumugama ulatulongezya akaambo kaluyando ndotujisi kubakwesu. (Int. 41:1, 2; Heb. 6:10) Ino nkaambo nzi ncomutalibikkili mbaakani yakubazyiba bakwesu banji kweelana ambomukonzya?