Amube Aluzyibo Mukugwasya Bamwi Kuti Bakabone Kaambo
1. Ncibalo nzi camu Bbaibbele ncotuyanda kulanga-langa, alimwi nkaambo nzi?
1 Makani ngaakaamba mwaapostolo Paulo mucikombelo caku Antiokeya mu Pisidiya mbuli mbokulembedwe ku Incito 13:16-41, ncikozyanyo cibotu cijatikizya mbotukonzya kugwasya bamwi kukabona kaambo nkotuli mukubandika. Paulo wakabikkila maano kubukkale alimwi amizeezo yabaswiilizi bakwe eelyo wakacinca nzila njaakali kubelesya kwaamba makani mabotu kutegwa yeendelane azintu eezyo. Mbotuyaabulanga-langa cibalo eeci, atubone mbotukonzya kucita munzila njoona eeyi mumulimo wesu.
2. Ncinzi ncotwiiya kunzila njaakabelesya Paulo kutalika makani aakwe?
2 Amujane Kaambo Nkomuzuminana: Nokuba kuti mulumbe wa Paulo wakayeeme amulimo mupati ngwajisi Jesu mukuzuzikizyigwa kwa makanze a Leza, Paulo tanaakatalika makani aakwe kwiinda mukwaamba kaambo aako. Muciindi caboobo, wakaamba kaambo nkaakali kuzuminana abunji bwabaswiilizi bakwe ibakali bama Juda—izyakacitikila bama Juda musyule. (Inc. 13:16-22) Mbubwenya buyo, tuyoozwidilila kapati akubanjila mumoyo bantu ikuti naa twasoleka kujana kaambo nkotuzuminana ambabo. Eeci inga cayandika kuti tubakulwaizye kwaamba nzyobayeeya kwiinda mukubuzya mibuzyo cabupampu alimwi akuswiililisya kutegwa tuzyibe cini ncobayandisya.
3. Ncinzi cakapa kuti cibayumine baswiilizi ba Paulo kuzumina kuti Jesu ngowakali Mesiya wakasyomezyedwe?
3 Naakali kubandika izyakacitikila bama Juda musyule, Paulo wakayeekezya baswiilizi bakwe zyacisyomezyo ca Leza cakuleta Mufwutuli kuzwa muzyalani lya Davida. Pele, ibunji bwaba Juda bakali kulangila sikalumamba uuli ampuwo iwakali kuyooangulula bama Juda kuzwa mubulelo bwaba Roma alimwi akusumpula cisi caba Juda kwiinda zisi zimbi. Cakutadooneka bakalizyi kuti Jesu wakakakwa abasololi bacikombelo caba Juda mu Jerusalemu, wakaabwa kubaleli bana Roma alimwi wakajayigwa. Mbuti Paulo mbwaakali kukonzya kubazula kuti Jesu ngowakali Mesiya wakasyomezyedwe?
4. Mbuti Paulo caluzyibo mbwaakabagwasya baswiilizi bakwe bama Juda kumvwisya kaambo?
4 Amucince Nzila Njomubelesya: Mbwaanga Paulo wakalizyi ncobakali kuyeeya baswiilizi bakwe, wakabelesya Magwalo kutegwa abagwasye kukabona kaambo kwiinda mukwaamba zintu nzyobakali kusyoma. Mucikozyanyo, wakaamba kuti Jesu wakazwa muluzubo lwa Davida alimwi akuti ngonguwe ngwaakali kwaamba Johane Mubbapatizyi walo wakali kusyomwa kapati kuti mmusinsimi wa Leza. (Inc. 13:23-25) Paulo wakaamba kuti kwiinda mukukaka Jesu alimwi akumusinganya kufwa, basololi bacikombelo ‘bakazuzikizya majwi aabasinsimi.’ (Inc. 13:26-28) Kuyungizya waawo, wakapandulula kuti kwakali bantu ibakalibonena kuti Jesu wakabusyigwa kubafwu alimwi wakapandulula Magwalo ngobakazyi baswiilizi bakwe bama Juda alo aakazuzikizyigwa naakabuka Jesu.—Inc. 13:29-37.
5. (a) Mbuti Paulo mbwaakacinca nzila njaakali kubelesya naakali kukananina bama Giliki? (b) Mbuti mbotukonzya kwiiya cikozyanyo ca Paulo notukambaukila mucilawo motubelekela?
5 Kunze lyaboobo, ciindi naakali kukananina bama Giliki mu Areopagi ku Atene, Paulo wakabelesya nzila imbi. (Inc. 17:22-31) Nokuba boobo, mulumbe ngwaakaamba tiiwakacinca pe, alimwi mumbazu zyoonse zyobile ikusoleka kwakwe kwakaleta mpindu. (Inc. 13:42, 43; 17:34) Mbubwenya buyo amazuba aano, tuyoozwidilila mumulimo wesu ikuti naa twasoleka kujana kaambo nkotuzuminana abaswiilizi besu alimwi ikuti katucinca nzila njotubelesya kutegwa yeendelane abukkale bwabo alimwi ancobayeeya.