Sena Mulilibambilide Kuntenda Zilicitikila?
1. Ino nkaambo nzi ncocili kabotu kuba bantu balibambilide kuntenda?
1 Amwaka, tuulunzuma twabantu nyika yoonse kubikkilizya abakwesu alimwi abacizi, balapenga akaambo kakuzungaana kwanyika, ciyumayuma alimwi akupaya kwamaanzi. Mbokunga ntenda zilicitikila zilacitika cakutayeeyelwa alimwi zilakonzya kumucitikila aumwi wandiswe, cili kabotu kuba bantu balibambilide.—Tus. 21:5.
2. Ino nkaambo nzi ncotweelede kubazibya baalu kujatikizya makkeyala alimwi amanamba aaluwaile ngotubelesya lino?
2 Kaitanacitika Ntenda: Ziindi zimwi beendelezi balakonzya kucenjezya kujatikizya ntenda iiyanda kucitika. Cilayandika kuswiilila kukucenjezya ooko. (Tus. 22:3) Mubukkale bwamusyobo ooyu, baalu bayoosoleka kubonana abantu boonse bamumbungano kutegwa babagwasye kulibambila bweelede. Noyacitika ntenda, baalu bayoosoleka alimwi kubonana aboonse bamumbungano kubona naa bali buyo kabotu alimwi akuziba lugwasyo lukonzya kuyandika. Ciindi ciyandika cilakonzya kunyonyoonwa ikuti baalu kabatajisi makkeyala naa manamba aaluwaile mapya. Aboobo cilayandika kuti basikumwaya bamuzibya mulembi alimwi amulangizi waciiyo cabbuku kujatikizya makkeyala alimwi amanamba aaluwaile ngobabelesya lino.
3. Mbuti mbotukonzya kubelekela antoomwe abaalu ikuti katukkala mubusena mucitika-citika ntenda?
3 Ikuti mbungano kaili mubusena mucitika-citika ntenda, baalu balakonzya kulomba basikumwaya kuti babape zina alimwi anamba yaluwaile yamusazinyina naa mulongwe uutakkali aafwaafwi abusena oobo alimwi ooyo weelede kuzibisyigwa ikuti naa kwacitika ntenda. Eeci ciyoogwasya baalu kuziba nkobabede aabo bagwisigwa mubusena oobo. Alimwi baalu balakonzya kubamba bubambe bujatikizya ncoiyoocita mbungano ikuti naa kwacitika ntenda calo cibikkilizya akulanga-langa zintu zyakubelesya nokwacitika ntenda zyalo muntu aumwi nzyayelede kuba azyalo, bubambe bwakuzwa alimwi anzila zyakugwasya baabo bayandika lugwasyo lwaalubazu. Cilayandika kubutobela bubambe bwaluyando oobu.—Heb. 13:17.
4. Ino ncinzi ncotweelede kucita ikuti kwacitika ntenda mubusena motukkala?
4 Yacitika Ntenda: Ino ncinzi ncomweelede kucita ikuti ntenda yacitika mubusena momukkala? Amube masimpe kuti mwazilanganya nzyobayandika kumubili bamumukwasyi wanu aciindi eeco. Mwanookonzya, amupe lugwasyo luyandika kuli bamwi bajatikizyigwa. Cakufwambaana, amusoleke kubonana amulangizi wanu waciiyo cabbuku naa mwaalu umwi. Eeci ceelede kucitwa nokuba kuti muli kabotu alimwi tamuyandiki lugwasyo. Ikuti kamuyanda lugwasyo, amusyome kuti bakwesu balasoleka kusikila mpobagolela kutegwa bamugwasye. (1 Kor. 13:4, 7) Kamuyeeyede kuti Jehova ulibuzi bukkale bwanu; amumusyome kuti ulamugwasya. (Int. 37:39; 62:8) Amupakamane kuzyoolwe zyakupa lugwasyo lwakumuuya alimwi amumizeezo kuli bamwi. (2 Kor. 1:3, 4) Cakufwambaana, amwiitalike alimwi milimo yanu yakumuuya.—Mt. 6:33.
5. Ino swebo mbotuli Banakristo tujatikizigwa buti kuntenda?
5 Nokuba kuti kucitika kwantenda kupa bantu kulibilika kapati, tulakonzya kulangila kumbele calusyomo. Ino-ino ntenda zyoonse ziyoomana. (Ciy. 21:4) Kuciindi eecino, tulakonzya kubweza ntaamu zigwasya kutegwa tulibambile kuziindi zyamapenzi amakatazyo notuzumanana kuba basungu mukukambauka makani mabotu kubantu.