“Ulakatalusya Bakateede”
1 Ciindi aciindi toonse tulakatala. Tulakatala ikutali buyo akaambo kamulimo naa milimo imwi pele alimwi akaambo kabuyumu-yumu mbotujana ‘mumazuba aakumamanino aano aakataazya.’ (2 Tim. 3:1) Mbotuli babelesi ba Jehova, ino tuzijana buti nguzu zyakumuuya ziyandika kutegwa tutatolwaali mumulimo wesu? Tulazijana kwiinda mukusyoma ooyo uuli ‘ngusinguzu,’ Jehova. (Is. 40:26) Ulizizi nzyotuyandika alimwi ulayandisisya kutugwasya.—1 Pet. 5:7.
2 Bubambe Bwakutugwasya Mbwabikkide Jehova: Jehova ulatuyumya kwiinda mumuuya wakwe uusalala, muuya nguwenya ngwaakabelesya kulenga bubumbo boonse. Muuya wa Leza ulatugwasya ‘kuba anguzu’ ikuti twakatala. (Is. 40:31) Amulibuzye kuti, ‘Ndilili nondakaupailila muuya uusalala kuti undiyumye kutegwa ndizuzikizye mikuli yangu ya Bunakristo?’—Lk. 11:11-13.
3 Kwiinda mukubala akuzinzibala kuyeeya a Jwi lya Leza lyakasololelwa amuuya alimwi akusaninwa kumuuya kwiinda mukwiiya mabbuku eesu aa Bunakristo lyoonse, tuyooba mbuli “musamu uuzikidwe kumbali atulonga twamaanzi, uuzyala micelo yawo kuciindi ceelede, uujisi matu aatayumi.”—Int. 1:2, 3.
4 Jehova alimwi ulabelesya basyomima balo ibakonzya ‘kutuumbulizya.’ (Kol. 4:10, 11) Balatuyumya-yumya kumiswaangano yambungano kwiinda mumibandi yabo iikulwaizya, bwiinguzi alimwi amakani ngobapa. (Inc. 15:32) Baalu Banakristo ikapati balatugwasya kumuuya akutukulwaizya.—Is. 32:1, 2.
5 Mulimo Wakukambauka: Ikuti naa mulimvwa kukatala, mutaleki kukambauka! Kwiindana amilimo minji imwi, kutola lubazu lyoonse mumulimo wakukambauka kulatukatalusya. (Mt. 11:28-30) Kukambauka makani mabotu kulatugwasya kubikkila maano ku Bwami bwa Leza alimwi akuba abulangizi bwini-bwini bwabuumi butamani.
6 Kuli zintu zinji nzyotweelede kucita nyika eeyi mbyaabi kaitana kunyonyoonwa. Tujisi twaambo tutupa kuyuma mumulimo wakukambauka, ‘kubeleka kunguzu nzyatupa Leza.’ (1 Pet. 4:11) Kwiinda mukugwasigwa a Jehova, tuyoouzuzikizya mulimo wesu, nkaambo “ulakatalusya bakateede.”—Is. 40:29.