Amubagwasye Bantu Bacete Kuba Abulangizi
1 Jesu wakabayandisya bantu bacete. Kwakali ziindi naakali kupa lugwasyo lwakumubili kwiinda mukucita maleele alimwi wakali kuponya balwazi, pele wakali kubikkila maano kukukambauka “makani mabotu” kubantu bacete. (Mt. 11:5) Mulimo wa Bunakristo mazuba aano ucizumanana kugwasya bantu bacete kubikkilizya abantu bamwi buyo.—Mt. 24:14; 28:19, 20.
2 Bulangizi Bwini-bwini: Babelesi ba Bunakristo Bwanyika kanji-kanji basyomezya bantu bacete kuti bayoovwuba ikuti basanga mali manji kucikombelo. Kunze lyaboobo, Ibbaibbele liyiisya kuti Bwami bwa Leza bulikke mbobuyoomana bucete amapenzi woonse ngobajisi bantu. (Int. 9:18; 145:16; Is. 65:21-23) Kwiinda mukubatondezya bacete cini Bbaibbele ncoliyiisya, tubapa bulangizi akubagwasya kumuziba akumukomba Leza.—Mt. 5:3.
3 Ba Farisi muciindi ncaakali kupona Jesu, tiibakali kubabikkila maano bantu bacete, bakali kubaita azina lyakusampaula lyakuti ‘am-ha·’aʹrets,” naa “bantu baansi.” Pele Jesu wakabona “bulowa bwabo,” naa buumi bwabo kuti “bulayandika.” (Int. 72:13, 1) Tulakonzya kumwiiya Jesu ‘akubafwida luzyalo bacete’ kwiinda mukubabikkila maano akubagwasya mumapenzi aabo. (Tus. 14:31) Tatweelede kwaamba cakunyasya kujatikizya bantu ibakkala mumasena aapengede naa kutondezya kutababikkila maano kubakambaukila. Bantu banji batambula mulumbe wa Bwami mbantu bacete.
4 Amubagwasye Lino: Ikubayiisya njiisyo zyamu Bbaibbele bacete bali mucilawo, kulabagwasya kucesya bucete lino. Mucikozyanyo, Ibbaibbele lilakasya kukolwa, kuuma njuka, butolo, kufweba amicito buyo imwi iipa bucete. (Tus. 6:10, 11; 23:21; 2 Kor. 7:1; Ef. 5:5) Magwalo akulwaizya kusyomeka akubeleka ‘amoyo omwe,’ ibube buyandika kubabelesi. (Kol. 3:22, 23; Heb. 13:18) Mukuvwuntauzya kumwi kwakacitwa, bunji bwabasikulemba milimo bakaamba kuti kusyomeka mbobube mbobayanda nobayandaula mubelesi.
5 Jehova ulaalanganya mapenzi aabantu bacete. Lino-lino Jesu Kristo uyoovwuna “bacete nibakwiila.” (Int. 72:12) Kusikila kuciindi eeco, tulijisi coolwe cakuumbulizya bamwi kubikkilizya abacete kwiinda mukubaambila mulumbe wamu Bbaibbele uupa bulangizi.