‘Amutobele Mumikondo Yakwe’
1. Ino mbuti mbotunga twaba bakambausi bacibwene?
1 Jesu kunyina naakaiya muzikolo zyanjiisyo zyabukombi bwaba Juda, nokuba boobo wakali Mukambausi uucibwene kapati kwiinda iwakaponede. Mucoolwe, imakani aalembedwe aajatikizya mulimo wa Jesu akayobolwa kuti atugwasye. Kutegwa tube bakambausi bacibwene, tweelede kutobela “mumikondo yakwe.”—1 Pet. 2:21.
2. Ino ncinzi ciyootugwasya kuba aaluyando kubantu iluli mbuli ndwaakajisi Jesu?
2 Amutondezye Kuti Mulabayanda Bantu: Kubayandisya bantu kwakamukulwaizya Jesu. (Mk. 6:30-34) Bantu banji mucilawo cesu bali ‘mukumyongwa’ alimwi bayandika kuyiisya kasimpe. (Rom. 8:22) Kuyeeya bukkale bubyaabi kapati mobabede alimwi ambwababikkila maanu Jehova, kuyootukulwaizya kuzumanana kukambauka. (2 Pet. 3:9) Kunze lyaboobo, bantu bayooswiilila kumulumbe ngotukambauka ikuti babona kuti tulababikkila maanu kapati.
3. Ino muziindi zili buti Jesu naakali kukambaukila bantu?
3 Amukambauke Kufwumbwa Ciindi: Jesu wakabelesya kufwumbwa ciindi ncaakajana ikukambaukila bantu makani mabotu. (Mt. 4:23; 9:9; Joh. 4:7-10) Mbubwenya buyo, tweelede kuba bantu balibambilide kubandika kujatikizya kasimpe ciindi notubeleka milimo yaabuzuba. Bamwi balabikka Bbaibbele alimwi amabbuku afwiifwi kutegwa kabakambauka nobali kumilimo, kucikolo, mulweendo anobaunka kukuula zintu alimwi amuziindi zimbi buyo.
4. Ino mbuti Bwami mbobunga waba ngomutwe wamakani mumulimo wesu wakukambauka?
4 Bwami Akabe Nkakaambo Kapati: Makani mabotu aa Bwami ngowakali mutwe wamakani wamulimo wakukambauka ngwaakacita Jesu. (Lk. 4:43) Nokuba kuti mubandi wesu ulakonzya kutaamba Bwami cacigaminina, atubikkile maanu kukumugwasya mukamwiniŋanda kubona mbobuyandika. Nociba ciindi notwaamba bukkale bubyaabi butondezya kuti tupona mumazuba aamamanino, ncotuli mukucita aawa tuli ‘mukukambauka makani mabotu aazintu zibotu.’—Rom. 10:15.
5. Kutegwa tucikonzye kuyiisya kabotu mumulimo wesu, ino mbuti Bbaibbele mbolikonzya kugwasya?
5 Amusyome Ijwi lya Leza: Mumulimo wakwe woonse, Jesu wakali kubelesya Magwalo mukuyiisya kwakwe. Kunyina naakayiisya zyamumizeezo yakwe pe. (Joh. 7:16, 18) Wakali kubala Jwi lya Leza akulibelesya kuba cikwabilizyo ciindi ncaakali kulwanwa a Saatani. (Mt. 4:1-4) Kutegwa tucikonzye kubayiisya kabotu bantu, tweelede kubala Bbaibbele abuzuba alimwi akuzibelesya nzyotwiiya. (Rom. 2:21) Notwiingula mibuzyo mumulimo wakukambauka, tweelede kwaamba Magwalo aagwasyilizya twaambo ntotwaamba alimwi akwaabala mu Bbaibbele kufwumbwa kuti kacikonzyeka. Tuyanda kuti mukamwiniŋanda abone kuti tatwaambi buyo twaambo twesu tobeni, pele kuti nzyotwaamba zizwa mu Jwi lya Leza.
6. Ino ncinzi Jesu ncaakacita kutegwa makani aakwe abanjile mumoyo basikumuswiilila?
6 Kuyiisya Kwanu Akubanjile Mumoyo: “Takunabede muntu uuamba bobuya.” (Joh. 7:46) Oobu mbobakaamba bamapulisa kujatikizya Jesu nobakabuzyigwa abapaizi bapati aba Farisi ikaambo ncobakakakilwa kumujata. Muciindi cakwaamba buyo twaambo mbotubede, Jesu wakali kuyiisya munzila yakali kubanjila mumyoyo bantu. (Lk. 24:32) Wakali kubelesya zikozyanyo nzyobakazi bantu boonse kutegwa abagwasye kumvwisya mulumbe wakwe. (Mt. 13:34) Jesu kunyina naakali kubaambila makani manji kapati basikumuswiilila. (Joh. 16:12) Wakabikkila maanu kuli Jehova muciindi cakulibikkila maanu lwakwe mwini. Mbubwenya mbuli Jesu, tulakonzya kuba bamayi bacibwene lilikke ‘twanoobikkila maanu lyoonse kukuyiisya kwesu.’—1 Tim. 4:16.
7. Ino nkaambo nzi Jesu ncaakazumanana mumulimo wakukambauka?
7 Amuzumanane Nobatabikkili Maanu Bantu Alimwi Nobakazya: Nokuba kuti Jesu wakacita milimo mipati, bantu banji kunyina nobakamuswiilila. (Lk. 10:13) Nobaba basazinyina Jesu bakayeeya kuti “wasondoka.” (Mk. 3:21) Nokuba boobo, Jesu wakazumanana. Wakazilanga munzila iili kabotu zintu nkaambo wakalisinizyide kuti wakajisi kasimpe ikakonzya kunununa bantu. (Joh. 8:32) Kwiinda mukugwasyigwa a Jehova, andiswe tukanzide kutalengaana.—2 Kor. 4:1.
8, 9. Ino mbuti mbotunga twamwiiya Jesu mukuliimya zintu zyakumubili akaambo kamakani mabotu?
8 Atusoleke Kulyaaba Kutegwa Tutole Lubazu Cakumaninina: Jesu wakaliimya zintu zibotu zyakumubili akaambo kamulimo wakukambauka. (Mt. 8:20) Wakali kukambauka cabusungu, aabona zimwi ziindi kusikila kumangolezya. (Mk. 6:35, 36) Jesu wakalizi kuti wakajisi ciindi cisyoonto cakubeleka mulimo ooyu. Akaambo kakuti “ciindi [cisyeede] ncifwiifwi,” andiswe tweelede kubelesya ciindi, nguzu alimwi azintu nzyotujisi mukwiiya cikozyanyo ca Jesu.—1 Kor. 7:29-31.
9 Banakristo bamumwaanda wamyaka wakusaanguna bakali bakambausi bacibwene akaambo kakuti bakaiya Jesu. (Inc. 4:13) Andiswe tulakonzya kuubeleka cabusungu mulimo wesu wakukambauka ikuti twamwiiya Mukambausi mupati kwiinda iwakaponede.—2 Tim. 4:5.