Amubaumbulizye Balila
1. Ino nkaambo nzi bantu bali mubuumba ncobayandika luumbulizyo?
1 Kufwidwa muyandwa wesu kulausisya kapati, kwaambisya kuli baabo batajisi bulangizi bwa Bwami. (1 Tes. 4:13) Bantu banji balalibuzya kuti: ‘Ino nkaambo nzi bantu ncobafwida? Ino nkuli nkobaunka? Sena kuli nondiyoomubona alimwi muyandwa wangu?’ Ansi aawa kuli nzila zimwi nzyotukonzya kubelesya twanoowumbulizya bantu ibali mubuumba bwakufwidwa musazinyina naa mulongwe mbotujana mumulimo wamumuunda.—Is. 61:2.
2. Ikuti mukamwiniŋanda watwaambila kuti ujisi dilwe, sena lyoonse tweelede kusoleka kumukambaukila kwaciindi cilamfwu?
2 Kuŋanda Aŋanda: Mukamwiniŋanda inga watwaambila kuti wakafwidwa umwi wamumukwasyi ino-ino aawa. Sena muntu ooyu uluuside kapati, kutondezya kuti dilwe lyakacitika ino-ino? Sena muŋanda muli buyo bamukowa bauside kapati? Ikuti kacili boobu, inga cabota kutakkala ciindi cilamfwu katukambauka. (Muk. 3:1, 7) Ambweni tulakonzya kumwaambila kuti twausa kapati kumvwa makani aayo, eelyo akusiya katulakiti keelela, magazini naa broshuwa, mpoonya cabulemu atulaye akuzwa aŋanda eeyi. Eelyo tulakonzya kuyoopilukila aciindi ceelede kutegwa tukazumanane kubandika majwi aawumbulizya kuzwa mu Bbaibbele.
3. Ikuti kacikonzyeka, ino mmagwalo aali ngotunga twamutondezya mukamwiniŋanda uuside?
3 Muziindi zimwi, inga twabona kuti tulakonzya kwaamba zintu zinji mukuswaya kwakusaanguna. Nokuba kuti eeci tacili ciindi cakukazya mizeezo iilubide, tulakonzya kubabalila zisyomezyo zili mu Bbaibbele zijatikizya bubuke. (Joh. 5:28, 29) Ambweni tulakonzya kumutondezya ncolyaamba Bbaibbele kujatikizya ciimo cabafwu. (Muk. 9:5, 10) Makani aali mu Bbaibbele aamba zyabantu bakabusyigwa aalo alakonzya kuumbulizya. (Joh. 11:39-44) Nzila imwi njakulanga-langa majwi aajatikizya kulangila kuli Jehova alo ngaakaamba Jobu. (Job. 14:14, 15) Katutanalaya, tulakonzya kwaabila mabroshuwa aaya: Ncinzi Cicitika Kulindiswe Twafwa?, Iciindi Muntu Ngomuyanda Nafwa noiba broshuwa iimbi naa katulakiti keelela. Ambweni inga twamwaabila bbuku lya Bbaibbele Ncoliyiisya, atumutondezye twaambo tuli mucibalo 6, mpoonya akupanga bubambe bwakuti tukatubandike twaambo ootu twaakupiluka.
4. Ino muziindi zili buti zimbi motweelede kupa luumbulizyo?
4 Muziindi Zimbi: Ikuti dilwe naa makani aadilwe acitilwa ku Ŋanda ya Bwami, sena kuyoojanika bantu batali Bakamboni ba Jehova? Balakonzya kwaabilwa mabbuku aawumbulizya. Mumaanda aadilwe mumwi, batondezya kulumba kapati akaambo kakuba aamabbuku aayelela aakupa mikwasyi iili mubuumba bwakufwidwa. Zimwi ziindi, kwaambilizya dilwe ikujanika mumuteende kujalula nzila yakulemba lugwalo luumbulizya mukwasyi wakafwidwa. Ciindi umwi mulumi iwakafwidwa mukaintu naakatambula lugwalo mwakabikkilizidwe amatulakiti, walo amwanaakwe musimbi bakaunka kuŋanda yasikumwaya mucizi, mpoonya bakamubuzya sikumwaya kuti: “Sena ndinywe mwakanditumina lugwalo oolu? Mebo ndilayanda kuzyiba zinji kujatikizya Bbaibbele!” Mwaalumi ooyu amwanaakwe musimbi bakazumina kuyiisyigwa Bbaibbele alimwi bakatalika kujanika kumiswaangano yambungano.
5. Ino nkaambo nzi ncotweelede kupakamana kuyandaula nzila mbotunga twaumbulizya bantu bali mubuumba?
5 Lugwalo lwa Mukambausi 7:2 lwaamba kuti: “Kuya kuŋanda yadilwe nkubotu kwiinda kuya kuŋanda yakusekelela.” Muntu uuli mubuumba ulayandisisya kuswiilila Jwi lya Leza ikwiinda baabo bayandisya zyakulikondelezya. Toonse tweelede kupakamana kuyandaula nzila mbotunga twaumbulizya bantu bali mubuumba bwakufwidwa muyandwa wabo.