Tujisi Lubono Lubotu Kapati Ndotuyandika Kwaabila
1 Ijwi lya Leza lizwide njiisyo ziyandisi zyalo nzyotubikkila maano kapati. (Int. 12:6; 119:11, 14) Ciindi cimwi, Jesu wakabelesya zikozyanyo izitondezya zibeela ziindene-indene zya Bwami, mpoonya wakababuzya basikwiiya bakwe kuti: “Sa mwamvwisya makani aya oonse?” Nobakamwaambila kuti bamvwisya, wakabaambila kuti: “Mulembi umwi aumwi uuba sikwiiya mu-Bwami bwakujulu ulikozyene amwiniŋanda uugwisya muciyobwedo cakwe zintu zipya azintu zikulukulu.”—Mt. 13:1-52.
2 Makani aakasimpe kamu Bbaibbele ngotwakaiya ciindi notwakatalika kwiiya kasimpe, alakonzya kutubeda mbuli lubono lwakaindi. Aboobo kwiinda mukuzumanana kuyungizya luzyibo lwesu notucita ciiyo cesu tobeni icijatikizya makani mapati aali mu Jwi lya Leza, tulajana makani aambi aakasimpe kamu Bbaibbele, alo aali lubono lupya kulindiswe. (1 Kor. 2:7) Alimwi, kwiinda “[mu]muzike musyomesi uucenjede,” tulakonzya kwaamvwisya makani aaya mapya.—Mt. 24:45.
3 Tulazibikkila kapati maano mbono zyakaindi alimwi azipya eezyi zyakumuuya. Eeci citupa kuti katuyanda kuyiisyigwa kutegwa tube bamayi bacizyi kuyiisya Jwi lya Leza, ibaambila bantu cabuuya makani aakasimpe ngotwakaiya.
4 Amwiiye Cikozyanyo ca Jesu: Katondezya mbwaakali kwaabona makani mayandisi aaya, Jesu wakacita kufwumbwa cakali kukonzyeka kutegwa aambile bamwi. Nociba ciindi naakakatede, kunyina naakacileka kukambauka.—Joh. 4:6-14.
5 Luyando Jesu ndwaakajisi kubantu ibatakajisi luzyibo lwini-lwini lwa Leza amakanze aakwe, lwakamukulwaizya kuti abaambile makani aakasimpe ka Leza. (Int. 72:13) Wakabeetelela aabo bakali kuyanda kwiiya makani aajatikizya Leza amakanze aakwe alimwi eeci cakamukulwaizya “kubaiisya makani manji.”—Mk. 6:34.
6 Amumwiiye Jesu: Ikuti andiswe twazibikkila maano mbono nzyotujisi, tuyooyandisisya kubatondezya bantu makani mabotu kuzwa mu Bbaibbele mbubwenya mbuli mbwaakacita Jesu. (Tus. 2:1-5) Nokuba kuti zimwi ziindi inga katukatede, tuyookanana kujatikizya makani aakasimpe aamu Magwalo cabusungu. (Mk. 6:34) Ikulumba camoyo woonse akaambo kalubono ndotujisi ciyootupa kuti tucite kufwumbwa ncotukonzya mumulimo wakukambauka, nkokuti lyoonse tunooyandisya kuti katutola lubazu.