Mubweendelezi bwa Leza, zilenge zyoonse zyakalikamantene alimwi zyakali muluumuno

Nkaambo Nzi Ncotuyandika Bwami bwa Leza?

Ciindi nobakalengwa bantu bakusaanguna, Mulengi wesu, walo uujisi zina lyakuti Jehova, ngowakali Mweendelezi alikke. Wakali kweendelezya munzila yaluyando. Wakabamba munzi mubotu, nkokuti muunda wa Edeni kutegwa bantu kabakkala mumo. Alimwi wakabapa zyakulya zinji kapati. Kuyungizya waawo, bantu wakabapa mulimo wakucita uukkomanisya. (Matalikilo 1:28, 29; 2:8, 15) Bantu nokunga bacili muluumuno ikuti nobakazumanana kuzumina bweendelezi bwa Leza bwaluyando.

Adamu ujisi mucelo uukasyidwe ngwaamupa Eva. — Bantu bakusaanguna bakamukaka Leza kuba Mweendelezi wabo

Bbaibbele lyaamba kuti mungelo muzangi, walo iwakazikwiitwa kuti Saatani Diabolosi, wakakazya nguzu nzyajisi Leza zyakweendelezya. Wakaamba kuti bantu bakali kukonzya kukkomana kakunyina kusololelwa a Leza naa kweendelezyegwa anguwe. Cuusisya ncakuti, bazyali besu bakusaanguna ba Adamu a Eva bakamumvwida Saatani akumusangana mukuzangila bweendelezi bwa Leza. —Matalikilo 3:1-6; Ciyubunuzyo 12:9.

Akaambo kakuti ba Adamu a Eva bakamukaka Leza kuba Mweendelezi wabo, bakasweekelwa munzi wabo wa Paradaiso alimwi abulangizi bwakupona kukabe kutamani kabalondokede. (Matalikilo 3:17-19) Alimwi eeci ncobakacita cakabajatikizya abana mbobakali kuyooba abalo kumbele. Bbaibbele lyaamba kuti, akaambo kakuti Adamu wakabisya, ‘cibi cakanjila munyika alufwu kwiinda mucibi.’ (Baroma 5:12) Cibi cakasololela kupenzi limbi lipati: ‘Muntu weendelezya muntunyina munzila iimuletela mapenzi.’ (Mukambausi 8:9) Munzila imwi, ciindi bantu nobalyeendelezya, lyoonse kulaba mapenzi.

BWEENDELEZI BWABANTU BWATALIKA

Nimurodi uliimvwi cakulimvwa. Kusyule lyakwe, bantu balayaka. — Nimurodi wakamuzangila Jehova

Mweendelezi muntunsi wakusaanguna iwaambidwe mu Bbaibbele wakali Nimurodi. Alimwi wakabuzangila bweendelezi bwa Jehova. Kuzwa mumazuba aa Nimurodi, bantu ibajisi nguzu zyabweendelezi bali kuzibelesya munzila yalunya nguzu zyabo. Myaka iibalilwa ku 3,000 yainda, Mwami Solomoni wakalemba kuti: “Ndakabona misozi yabaabo badyaamininwa, pele kwakanyina wakubaumbulizya. Aabo ibakali kubadyaaminina bakalijisi nguzu.”—Mukambausi 4:1.

Bukkale bucili mbubwenya amazuba aano. Mu 2009, bbuku limwi lyaba United Nations lyakaamba kuti bweendelezi bubyaabi buyaabwiindila buya kulibonya kuti “mbobuleta mapenzi oonse aaliko munyika.”

CIINDI CAKUBWEZA NTAAMU!

Bantu bayandika beendelezi bali kabotu alimwi aamfwulumende iili kabotu. Alimwi buya eeci ncencico ncaakatusyomezya Mulengi wesu!

Zifwanikiso: Zintu zicitika akaambo kamfwulumende zyabantu. 1. Mukaintu waku Asia ulikkede mumugwagwa uulaatombe kajisi amwanaakwe uulila. 2. Mudaala uucisidwe ulilede mucibbadela. 3. Basikalumamba badubula ntobolo. 4. Bantu banyemede balayobeka kabajisi zikwankwani. 5. Mukaintu amwanaakwe baliimvwi anze aaŋanda yabo, bajana kuti gilazi lyakumulyango lyapwaigwa. 6. Mudolopo kuzwide sikunku abusi alimwi antambo zyamalaiti. — Noziba mfwulumende zyabantu izicita kabotu zyaalilwa kwaamana mapenzi aabakatazya kapati bantu

Leza wakabikka Bwami naa mfwulumende iiyoonjila mubusena bwamfwulumende zyoonse zyabantu, alimwi “bwalo bulikke buyakwiima nji mane kukabe kutamani.” (Daniele 2:44) Oobu mbo Bwami mamiliyoni aabantu mbobali kupailila. (Matayo 6:9, 10) Pele Leza tali nguwe uuyakweendelezya mfwulumende eeyi. Muciindi caboobo, wakasala Mweendelezi walo iwakaponede kali muntu. Ino Leza wakasala ni?