Amubayiisye Aabo Batacizyi Kubala Kabotu
1. Ino mbuyumu-yumu nzi mbotukonzya kujana notuli mubukambausi?
1 Notukambauka, zimwi ziindi tulajana buyumu-yumu bwakuyiisya bantu batakonzyi kubala kabotu. Ino ncinzi ncotukonzya kucita?
2. Ino mbuti mbotukonzya kubalemeka aabo batacizyi kubala kabotu alimwi nkaambo nzi ncotweelede kucita boobo?
2 Kamubalemeka: Jehova ulanga moyo wamuntu mbuubede ikutali lwiiyo lwakwe lwakumubili. (1 Sam. 16:7; Tus. 21:2) Aboobo tatweelede kubanyansya aabo batacizyi kubala kabotu. Tulakonzya kubagwasya bantu bali boobu ikuti twakkazyika moyo akutondezya kuti tulabalemeka. (1 Pet. 3:15) Tatweelede kubasinikizya kubala lugwalo naa muncali. Kwiinda mukuzumanana kwiiya kasimpe kamu Bbaibbele, muntu uuli boobo ulakonzya kuba aluyandisisyo lwakucizyiba kubala kabotu kutegwa kalibalila Jwi lya Leza “masiku asikati.”—Int. 1:2, 3.
3. Ino mbuti mbotukonzya kubayiisya Bbaibbele aabo batacizyi kubala kabotu?
3 Mbotukonzya Kubayiisya Bbaibbele: Zifwanikiso zilagwasya kapati mukuyiisya alimwi zipa kuti muntu atalubi nzyaali kwiiya. Mulakonzya kumulomba sikwiiya Bbaibbele kuti amwaambile ncaabona acifwanikiso cili mubbuku ndyomwiiya. Mpoonya amubelesye mibuzyo yacigaminina kutegwa mumugwasye kuzyiba ncocaamba cifwanikiso. Amubale magwalo aayendelana acifwanikiso eeco. Alimwi zifwanikiso zilakonzya kubelesyegwa kwiinduluka cibalo ncomwali kwiiya. Tamweelede kumuyiisya zyintu zinji aciindi comwe. Amukankaizye mutwe wacibalo atwaambo tupati-pati alimwi tamweelede kubandika twaambo tutako mucibalo ncomwiiya. Amwaabale magwalo mu Bbaibbele akubelesya mibuzyo kutegwa ngomuyiisya azyibe ncaamba. Eeci cilakonzya kupa kuti abe aluyandisisyo lwakuzyiba kubala kabotu kutegwa kavwuntauzya kasimpe kamu Bbaibbele.
4. Ino mbuti mbotukonzya kugwasya ngotuyiisya Bbaibbele kutegwa acizyibe kubala kabotu?
4 Zyintu Zigwasya Kwiiya Kubala Kabotu: Ibantu batakonzyi kubala kabotu balakonzya kutumvwisya akutatuluba twaambo ntobaiya. Mulakonzya kubakulwaizya bantu bali boobo kuti kababelesya mateepu aajisi makani aali mumabbuku eesu ikuti mateepu aayo kaaliko mumwaambo wenu. Ikuswiilila makani naabalwa muteepu akutobelezya mubbuku kulakonzya kugwasya muntu kucizyiba kubala kabotu. Ikwiinduluka kubala mabala cakupozya akwalo inga kwagwasya. Icimbi cinga cabagwasya aabo bayanda kucizyiba kubala kabotu, nkuswiililisya akutobelezya bani kubala ibacizyi kubala kabotu lyamiswaangano yesu.