Ino mbuti Mbomukonzya Kwiingula?
1. Nkaambo nzi ncotweelede kwiiya cikozyanyo ca Jesu ikuti twabuzyigwa mubuzyo?
1 Noliba lino, bantu balagambwa Jesu mbwaakali kubavwiila bantu nibakali kumubuzya. Ikuti twabuzyigwa mibuzyo mumulimo wakukambauka, tulakonzya kumwiiya Jesu mbwaakali kubavwiila bantu.—1 Pet. 2:21.
2. Ino ncinzi cikonzya kutugwasya kumwiingula kabotu muntu watubuzya mubuzyo?
2 Cakusaanguna Mweelede Kuswiilila: Jesu wakali kusaanguna kubona cakali kupa muntu kubuzya mubuzyo. Zimwi ziindi tweelede kumubuzya muntu mibuzyo imwi ikutegwa tuzyibe ncaamba. Mucikozyanyo, ikuti muntu wabuzya kuti, “Sena mulamusyoma Jesu?” ambweni uyanda kuzyiba ncotutasekeleli Kkilisimasi. Ikuti mwazyiba ncaamba sikubuzya, mulakonzya kujana nzila mbomunga mwamugwasya.—Lk. 10:25-37.
3. Ino ncinzi cikonzya kutugwasya kujana bwiinguzi bwamu Magwalo bugwasya?
3 Kamubelesya Ijwi lya Leza Nomwiingula: Kulagwasya ikubelesya Bbaibbele ikwiingula mibuzyo. (2 Tim. 3:16, 17; Heb. 4:12) Kabbuku kakuti Mboitalikwa akuzumanana Mibandi kalagwasya ikwiingula mibuzyo njobabuzya bantu. Nokuba kuti sikubuzya talisyomi Bbaibbele, mulakonzya kumugwasya kubona Magwalo ncaayiisya. Mulakonzya kumukulwaizya sikubuzya ikukkala ansi akubona busongo bujanwa mu Bbaibbele. Kwiinda mukumwiiya Jesu, bwiinguzi bwanu bulakonzya kuba “mbuli micelo yangolida mucisuwo cansiliva,”—nkokuti tulakonzya kubakkomanisya akubagwasya bantu.—Tus. 25:11.
4. Ino ncinzi cikonzya kupa kuti tutabainguli bantu bamwi?
4 Sena Tweelede Kwiingula Mibuzyo Yoonse? Ikuti kamutabuzyi bwiinguzi bwamubuzyo ngomwabuzyigwa, tamweelede kwiingula pesi mulakonzya kumwaambila kuti azyina nkaakumvwuntauzye ndiya kuboola alimwi. Ikwiingula boobo kulakonzya kupa kuti mwiniŋanda azumine kuti mukamuswaye alimwi. Ikuti mwabona kuti uubuzya uyanda buyo kuti mutalike kukazyanya, mulakonzya kumwiiya Jesu kwiinda mukutamwiingula muntu ooyo. (Lk. 20:1-8) Mbubwenya buyo, ikuti muntu umwi uutajisi luyandisisyo mukasimpe kayanda kuti mutalike kukazyanya, cakukazyika moyo mulakonzya kuutyokezya mubandi kutegwa muyandaule aabo bayanda kwiiya.—Mt. 7:6.
5. Ino Jesu wakatusiila cikozyanyo nzi kujatikizya mbotukonzya kwiingula mibuzyo?
5 Jesu wakalizyi kuti kutegwa azuzikizye mulimo wakwe ‘wakulungulula bwini’ akwiingula bantu ibakali kuyanda kuzyiba kasimpe, wakeelede kumusyoma Jehova. (Joh. 18:37) Andiswe tulaacoolwe cakubaingula bantu “basalidwe buumi butamani” mbubwenya mbwaakali kucita Jesu.—Inc. 13:48.