Amukambauke Lyoonse!
1. Ino ndulayo nzi lwa Paulo ndotweelede kubikkila maano mazuba aano?
1 ‘Kambauka makani lyoonse.’ (2 Tim. 4:2) Ino nkaambo nzi lulayo ndwaakapa Paulo ncoluyandika kapati mazuba aano? Ino buumi bwesu abuumi bwabamwi bujatikizidwe buti amajwi aaya?
2. Ino nkaambo nzi ncotulangaula baabo ibatana buzuba bamvwa makani mabotu?
2 Maumi Aabantu Alijatikizyidwe: Bantu babalilwa kutuulunzuma kuzinguluka nyika yoonse beelede kumvwa makani mabotu aakonzya kupa kuti bakafwutuke. (Rom. 10:13-15; 1 Tim. 4:16) Bantu banji bajisi luyandisisyo balimukujanika nomuba muzilawo zibelekelwa lyoonse. Ikuti naa twacinca buzuba naa ciindi cakuswaya, tulakonzya kujana bantu bambi. Ikulangaula kuli boobo kulakonzya kupa kuti tube amanjezyeezya aasalala akubula mulandu wabulowa.—Inc. 20:26.
3. Ino mbuti mbotukonzya kucibelesya kabotu ciindi notuli mumulimo wakukambauka?
3 Nokuba kuti bakali kupenzyegwa kapati, Banakristo bamumwaanda wamyaka wakusaanguna ‘bakazuzya Jerusalemu akwiisya kwabo.’ (Inc. 5:28) Sena andiswe tujisi makanze ‘aakulungulula’ makani mabotu cakulomya? (Inc. 10:42) Sena tucibelesya kabotu ciindi cesu notuli mumulimo wakukambauka? Ciindi notulindilila bamwi ibacita nyendo yakupilukila, sena tulabweza ntaamu yakukambaukila bamweenda nzila?
4. Ino mbuti kukambauka lyoonse mbokupa kuti tuzumanane kulangila?
4 Kupa Kuti Tupakamane Kapati: Mbokunga mamanino aabweende oobu bwazyintu ali aafwaafwi kapati, tweelede kuzumanana kupakamana akulangila. (1 Tes. 5:1-6) Ikukambauka makani aa Bwami lyoonse kupa kuti tutanyonganizigwi azyintu zyamunyika. (Lk. 21:34-36) Kunze lyaboobo, ikuzumanana ‘kulangila buzuba bwa Leza’ kupa kuti tukulwaizigwe kutola lubazu cabusungu mumulimo wakukambuka walo uupa kuti bantu bakafwutuke.—2 Pet. 3:11, 12.
5. Ino kubulanga munzila yeelede buumi kutukulwaizya buti mumulimo wakukambauka?
5 Notukambauka lyoonse, tutondezya kuti buumi tububona mbwabubona Jehova: “Tayandi kuti bantu bafwidilile, ulayanda kuti boonse bajane ciindi cakweempwa.” (2 Pet. 3:9; Ezk. 33:11) Atube amakanze aakukambaukila bantu banji ibali mucilawo cesu kutegwa Jehova atembaulwe!—Int. 109:30.