Banakristo Beelede Kupaila
1. Ino ncinzi ciyandika kutegwa tucikonzye kubeleka mulimo wakukambauka?
1 Tatukonzyi kuubeleka mulimo wakukambauka munguzu zyesu tobeni. Jehova ulatupa nguzu kutegwa tucikonzye kuubeleka mulimo ooyu. (Flp. 4:13) Ubelesya bangelo bakwe kutegwa batugwasye kujana bantu bali mbuli mbelele. (Ciy. 14:6, 7) Jehova nguupa kuti mbuto zyakasimpe nzyotusyanga akwiida zikomene. (1 Kor. 3:6, 9) Elo kaka cilayandika kuti Banakristo kabamusyoma Taateesu wakujulu kwiinda mumupailo!
2. Ino nzyintu nzi zimwi nzyotukonzya kupailila?
2 Tweelede Kulipailila: Tweelede kupaila lyoonse kutegwa tucikonzye kukambauka. (Ef. 6:18) Ino nzyintu nzi zimwi nzyotukonzya kupailila? Tulakonzya kupailila kuti katuzilanga kabotu zyintu mucilawo motukambaukila akuti katukambauka cabusicamba. (Inc. 4:29) Tulakonzya kumulomba Jehova kuti atusololele kubantu babombe myoyo kutegwa tutalike kwiiya Bbaibbele ambabo. Ikuti mukamwini ŋanda watubuzya mubuzyo, tulakonzya kupaila mupailo mufwaafwi cakaumuumu ikulomba Jehova kuti atugwasye kupa bwiinguzi buluzi. (Neh. 2:4) Tulakonzya kulomba busongo kutegwa katubikka mulimo wakukambauka mubusena bwakusaanguna. (Jak. 1:5) Kuyungizya waawo, Jehova ulakkomana notumulumba akaambo kacoolwe cilibedelede ncatupede cakuba babelesi bakwe.—Kol. 3:15.
3. Ino mbuti kupailila bamwi mbokupa kuti mulimo wakukambauka uyaambele?
3 Tweelede Kubapailila Bamwi: Tweelede ‘kukombelana,’ mane buya akubaamba mazyina babelesima ikuti kwayandika. (Jak. 5:16; Inc. 12:5) Sena kuciswa-ciswa kupa kuti mutacikonzyi kukambauka kapati? Ikuti naa mboobo amubapailile babelesinyoko bataciswi-ciswi. Mutalubi kuti mipailo njomupailila bamwi ilabeleka kapati. Alimwi cileelela kupailila beendelezi bamfwulumende kuti babe amyoyo iibombede kujatikizya mulimo wakukambauka kutegwa bakwesu ‘babe muluumuno akukkala kabotu akulemeka Leza.’—1 Tim. 2:1, 2.
4. Ino nkaambo nzi ncotweelede kuzumanana kupaila?
4 Kukambauka makani mabotu munyika yoonse, mulimo mupati ngotutakonzyi kucita munguzu zyesu tobeni. Pele ikuti naa “twajatisya kukomba,” tuya kucikonzya kuubeleka mulimo wakukambauka kwiinda mukugwasyigwa a Jehova.—Rom. 12:12.