Sena Zyintu Nzyondicita Zilazulila?
1. Ino nkulibilika kuli buti nkwakonzya kuba akwalo Munakristo uusyomeka?
1 Sena mwakalibuzya kale mubuzyo ooyu? Ndiza mulityompedwe akaambo kakuti tamucibeleki kapati mumulimo mbuli mbumwakali kucita kaindi akaambo kakucembaala, kuciswa-ciswa, naa kukomena kwamukwasyi ngomulanganya. Mucizyi umwi uujisi bana botatwe wakalemba kuti zimwi ziindi ulalipa mulandu akaambo kakuti kulanganya mukwasyi wakwe kupa kuti atabeleki ciindi cilamfwu mumulimo. Ino ncinzi cikonzya kutugwasya kutegwa tuzilange kabotu zyintu?
2. Ino ncinzi Jehova ncayanda kulindiswe?
2 Jehova Ncayanda Kulindiswe: Cakutadooneka, toonse tulayanda kubeleka ciindi cilamfwu mumulimo wakukambauka. Pele kanji-kanji kuli kwiindana kupati kuliko akati kazyintu nzyotuyanda kucita anzyotukonzya kucita. Kuba aluyandisisyo lwakubeleka ciindi cilamfwu mumulimo wakukambauka citondezya kuti tatulilendekezyi pe. Tweelede kuyeeya kuti Jehova ulizyi kabotu kulezya kwesu alimwi tatwaambili kucita zyintu nzyotutakonzyi. (Int. 103:13, 14) Ino ncinzi ncayanda kulindiswe? Uyanda kuti tumubelekele amoyo oonse, kusikila mpotugolela.—Kol. 3:23.
3. Ino mbuti mbotukonzya kuzyiba kuti tucita kabotu mumulimo wakambauka?
3 Ino ncinzi cikonzya kutugwasya kuti tuzyibe mpotugolela? Tulakonzya kumulomba Jehova kuti atugwasye kubona zyintu mbozibede ncobeni. (Int. 26:2) Mweenzuma, Munakristo uusimide uutuzyi kabotu alimwi uutayoowi kutwaambila notweelede kucinca awalo inga watugwasya. (Tus. 27:9) Amuyeeye alimwi kuti akaambo kakuti bukkale bulacinca, cilagwasya kulilingaula lyoonse.—Ef. 5:10.
4. Ino mbuti mbotweelede kwaabona malailile aazwa mu Bbaibbele ajatikizya mulimo wakukambauka?
4 Mbotweelede Kwaabona Malailile: Iciindi bantu nobali mumuzundano wakulunduka, ibeebelela kanji-kanji balakambilila kuti bakulwaizye basikulunduka kutegwa basike kumamanino. Mbubwenya buyo, malailile ngotujana mu Bbaibbele, kumiswaangano yesu amumabbuku atukulwaizya ‘kuti tukambauke makani lyoonse’ ikutali kututondezya kuti tulalezya. (2 Tim. 4:2) Tulakonzya kusyoma kuti kufwumbwa buyo naa twazumanana kubeleka kusikila mpotugolela, Jehova uyakuluyeeya ‘luyando amilimo’ njotumucitila.—Heb. 6:10.