‘Mutayoowi’
1. Ino mbuyumu-yumu nzi bukozyenye abwa Jeremiya mbotukonzya kujana?
1 Jeremiya wakalitenga ciindi naakabikkwa kuba musinsimi. Pele Jehova wakamuyumya-yumya kutegwa acikonzye kusinsima alimwi wakamwaambila kuti: “Utayoowi.” (Jer. 1:6-10) Mazuba aano, insoni naa kulitenga zilakonzya kutupa kuti tutabi basungu mumulimo wabukambausi. Ikuyoowa kuti bantu tabakonzyi kuutambula mulumbe naa ikuyeeya mbobakonzya kutubona kulakonzya kupa kuti tukakilwe kukambauka. Ino mbuti mbotukonzya kuleka kulibilika alimwi ino nzilongezyo nzi nzyotunga twajana?
2. Ino mbuti kulibambila mbokukonzya kutugwasya kucesya kulibilika kujatikizya mulimo wakukambauka?
2 Amulibambilile Limwi: Ikulibambila kulakonzya kupa kuti kulibilika kuceye. Mucikozyanyo, tulakonzya kulibambilila limwi mbotukonzya kuvwiila baabo bayanda kusinkilizya mubandi. (Tus. 15:28) Mulakonzya kubelesya ciindi ca Kukomba Mumukwasyi ikwiinduluka nzila ziindene-indene nzyomukonzya kubelesya nomuli kucikolo naa mumulimo wakukambauka.—1 Pet. 3:15.
3. Ino mbuti kusyoma Jehova mbokukonzya kutugwasya kuti tuleke kulibilika?
3 Amusyome Jehova: Ikusyoma Leza kulakonzya kupa kuti tuleke kulibilika. Jehova wakasyomezya kuti uyootugwasya. (Is. 41:10-13) Eelo kaka tulikwabilidwe kapati! Ikuyungizya waawo, Jesu wakatusyomezya kuti muuya uusalala wa Leza uyootupa kuti tucikonzye kukambauka lyoonse noliba leelyo nokucitika zyintu zyacibukilambuta. (Mk. 13:11) Aboobo, amumulombe Jehova muuya uusalala lyoonse.—Lk. 11:13.
4. Ino nzilongezyo nzi nzyotukonzya kujana ikuti naa twazumanana kukambauka nokuba kuti kuli buyumu-yumu?
4 Zilongezyo: Kwiinda mukuzumanana kukambauka noliba leelyo notujana buyumu-yumu, tulakonzya kulibambila kuzunda mapenzi aaboola kumbele. Tulakonzya kuba basicamba—icitondezya kuti tujisi muuya uusalala. (Inc. 4:31) Kunze lyaboobo, iciindi Jehova natugwasya kuti tuleke kulibilika, tuyumya lusyomo lwesu kuti ulakonzya kutufwutula. (Is. 33:2) Alimwi tulakkomana akukkutila akaambo kakuzyiba kuti tulamukkomanisya Tateesu wakujulu. (1 Pet. 4:13, 14) Aboobo atuzumanane kukambauka makani aa Bwami cabusicamba katujisi lusyomo lwakuti Jehova ulatugwasya.