Myuunda Yayuma Kale Kuti Itebulwe
1. Ino mulimo nzi mupati uuli mukucitwa?
1 Naakamana kukambaukila mukaintu muna Samariya, Jesu wakaambila basikwiiya bakwe kuti: “Amuwaale meso aanu mubone myuunda, nkaambo yayuma kale kuti itebulwe.” (Joh. 4:35, 36) Mulimo wakutebula wakumuuya uli mukucitwa alimwi Jesu wakabonena limwi mulimo ooyu mpuuyootaana kumbele munyika yoonse. Jesu ulatola lubazu mumulimo wakutebula kali kujulu. (Mt. 28:19, 20) Ino ncinzi citondezya kuti mulimo ooyu wazumanana kuyaambele nuuyaabuya kumamanino?
2. Ino ncinzi citondezya kuti mulimo wakutebula nyika yoonse uyaambele?
2 Butebuzi Bwanyika Yoonse: Mumwaka wamulimo wa 2009, mweelwe wabasikumwaya wanyika yoonse wakayungizyigwa a 3.2 pasenti. Mumasi mulimo wakukambauka muulesyedwe, mweelwe wabasikumwaya wakayungizyigwa a 14 pasenti. Mweelwe waziiyo zya Bbaibbele zyakali kweendelezyegwa mwezi amwezi wakaindilila a 7,619,000—imweelwe wiindilila amweelwe wabasikumwaya alimwi wakali kwiindilila mweelwe waziiyo zyakeendelezyegwa mwaka wa 2008 acisela cakaulunzuma. Mulimo mbuuyaabukomena mumasena manji, bamisyinali balayandika kapati mumasena aaya. Muzisi zinji, basikumwaya bakambaukila bantu babelesya mwaambo wakucisi cimbi, babeleka canguzu cakuti kuli butebuzi bupati. Cilalibonya kuti Jehova waubindaanya mulimo mumazuba aamamanino aabutebuzi. (Is. 60:22) Sena “myuunda” iili mucilawo canu mwiibona munzila yeelede?
3. Mbuti bamwi mbobakonzya kulimvwa kujatikizya butebuzi bwamucilawo cabo?
3 Butebuzi Bucitwa Mucilawo Canu: Bantu bamwi balakonzya kwaamba kuti: “Mucilawo cangu bantu banji tabaubikkili maano mulumbe.” Masimpe kuti muzilawo zimwi bantu baboneka kutabikkila maano kumulumbe mbuli bali muzilawo zimbi naaba kutabikkila maano kumulumbe mbuli mbobakali kucita kaindi. Bakamboni bamwi balakonzya kulimvwa kuti bantu banji beelede kutambula mulumbe bakacita kale oobo, kwasyaala buyo kubwezelela basyoonto basyeede. Sena ncobeni oobo mbocibede?
4. Ino mulimo wesu wakukambauka tweelede kuubona buti, alimwi nkaambo nzi?
4 Kuzwa kumatalikilo mane kumamanino, ciindi cakutebula nciindi camulimo mupati. Amubone Jesu mbwaakatondezya kuti kusyeede ciindi cisyoonto naakaamba kuti: “Mulimo wakutebula mupati, pele basimilimo mbasyoonto. Aboobo, amulombe Simalelo wabutebuzi kuti atume basimilimo mumulimo wakwe wakutebula.” (Mt. 9:37, 38) Jehova, Mwami uuli amuunda nguuzyi mulimo wakwe noweelede kucitwa ankoweelede kucitwa. (Joh. 6:44; 1 Ko. 3:6-8) Ino mulimo nzi ngotupedwe? Ibbaibbele lyaamba kuti: “Cifumofumo byala imbuto zyako, aciindi cagoko utalesyi maanza aako.” (Muk. 11:4-6) Mulimo wakutebula mbouyaabuya kumamanino, ecino tacili ciindi cakulyookezya.
5. Ino nkaambo nzi ncotweelede kuzumanana kukambauka cabusungu muzilawo bantu mobalibonya kutabikkila maano kumulumbe?
5 Amuzumanane Kutebula: Nokuba kuti mucilawo cesu twali kukambauka cakwiinduluka-induluka alimwi bantu balibonya kuti tababikkili maano kumulumbe, kuli kaambo kabotu ncotweelede kuzumanana kubeleka cabusungu alimwi akubindaana. (2 Ti. 4:2) Izyintu zicitika munyika zilakonzya kupa kuti bantu bacince akutalika kuyeeya ziboola kumbele. Bana mbobayaabukomena, bayakuyanda kuba aluumuno akuliiba. Ikuti twazumanana kubeleka cabusungu, tulakonzya kugwasya bantu abamwi. Masimpe, bantu batakali kubikkila maano kumulumbe balakonzya kuutambula kumbele. Nobaba baabo batayandi kuswiilila mulumbe acaali, beelede kucenjezyegwa.—Ezk. 2:4, 5; 3:19.
6. Ikuti kakuli buyumu-yumu mucilawo cesu, ncinzi cikonzya kutugwasya kuzumanana kukambauka cabusungu?
6 Ikuti kakuli buyumu-yumu mucilawo cesu, ncinzi cikonzya kutugwasya kuzumanana kukambauka cabusungu? Muciindi cakukambauka kuŋanda aŋanda, ambweni inga twakambaukila mumasena mobacita makwebo naa kubelesya luwaile naa kucinca-cinca mbotutalisya mibandi. Tulakonzya kucinca ciindi notuunka mukukambauka ambweni kuunka kumangolezya naa aciindi cimwi bantu nobajanika aŋanda. Ndiza tulakonzya kwiiya mwaambo uumbi kutegwa tukambaukile bantu banji makani mabotu. Tulakonzya kuyungizya ciindi ncotubeleka mumuunda kwiinda mukucita bupainiya bwaciindi coonse, naa kuunka kuyoobelekela kubusena kubulide batebuzi. Ikuti mulimo wakutebula tuubona munzila yeelede, tuyoobeleka canguzu mumulimo ooyu mupati kutegwa tukambaukile bantu banji.
7. Ino tweelede kuzumanana kubeleka mulimo ooyu kusikila lili?
7 Balimi tabajisi ciindi cinji cakutebula, aboobo balabeleka canguzu kusikila bamanizya. Mbubwenya buyo, butebuzi bwakumuuya abwalo buyandika kuti tubindaane. Ino tweelede kuzumanana kubeleka mulimo ooyu kusikila lili? Kusikila “kumamanino aabweende bwazyintu oobu.” (Mt. 24:14; 28:20) Mbubwenya mbuli Mubelesi mupati wa Jehova, tweelede kuumanizya mulimo ngotupedwe. (Joh. 4:34; 17:4) Aboobo, atuzumanane kubeleka mulimo wesu cabusungu, calukkomano alimwi akuubona munzila yeelede kusikila kumamanino. (Mt. 24:13) Mulimo wakutebula tuunamana!
[Majwi aakwelelezya sikubala aali apeeji 2]
Kuzwa kumatalikilo mane kumamanino, ciindi cakutebula nciindi camulimo mupati