Kupaila Akuzinzibala Kuyeeya—Zilayandika Kubabelesi Basungu
1. Ino ncinzi cakamugwasya Jesu kutanyonganizyigwa kumulimo wakwe wakali kuyandika?
1 Masiku oonse Jesu wakali kuponya bantu akubagwisya madaimona. Nobakamujana basikwiiya bakwe nibwakaca, bakaamba kuti: “Bantu boonse bayandaula nduwe.” Bakali kumukulwaizya kuti azumanane kucita milimo mipati. Pele Jesu tanaakanyonganizyigwa kumulimo uuyandika wakukambauka makani mabotu. Wakaingula kuti: “Atweende kubusena bumbi, muminzi iili munsi-munsi ikutegwa akwalo nkakambauke, nkaambo eeci ncindaboolela.” Ino ncinzi cakamugwasya Jesu kuzumanana kubikkila maano kumulimo wakwe? Wakalifwumide kupaila akuzinzibala kuyeeya. (Mk. 1:32-39) Mbuti kupaila akuzinzibala kuyeeya mbozikonzya kutugwasya andiswe kuba bakambausi basungu?
2. Ino nzyintu nzi nzyotukonzya kuyeeya zikonzya kutugwasya kuzumanana kuba basungu mumulimo wamumuunda?
2 Ncinzi Ncotweelede Kuzinzibala Kuyeeya? Jesu wakabona kuti bantu “bakali kupenzyegwa alimwi bakalimwaikide mbuli mbelele zinyina mweembezi.” (Mt. 9:36) Mbubwenya buyo, tulakonzya kuyeeya bantu mbobayanda kumvwa makani mabotu. Tulakonzya kuyeeya mbocimanide ciindi. (1 Ko. 7:29) Tulakonzya kuyeeya milimo ya Jehova abube bwakwe, acoolwe ncotujisi kuba Bakamboni ba Jehova, alimwi alubono lwakumuuya ndotwajana mukwiiya Jwi lya Leza ndobatazyi bantu bali mucilawo cesu.—Int. 77:11-13; Is. 43:10-12; Mt. 13:52.
3. Ino ndilili notukonzya kuzinzibala kuyeeya?
3 Ndilili Notukonzya Kuzinzibala Kuyeeya? Mbuli mbwaakacita Jesu, bamwi balafwuma bantu nobatasabili. Bamwi bajana kuti ciindi cibotu cakuzinzibala kuyeeya nkuumangolezya kabatana koona. (Matl. 24:63) Nokuba kuti tulibbaatidwe, tulakonzya kujana ciindi cakuzinzibala kuyeeya. Bamwi balacita oobo nobali mulweendo. Bamwi babelesya ciindi cakulyookezya masyikati nokutakwe babanyonganya. Bamwi bajana kuti kuzinzibala kuyeeya nobatanaunka mumuunda nokuba kwaciindi cisyoonto kulabagwasya kukambauka cabusungu acakutayoowa.
4. Ino nkaambo nzi ncotweelede kuzinzibala kuyeeya?
4 Kupaila akuzinzibala kuyeeya zilatugwasya kuba aluyandisisyo lwakubelekela Jehova, zilatugwasya kubona bukombi bwesu kuti ncecintu ciyandika kapati mubuumi bwesu alimwi akutugwasya kuzumanana kukambauka. Mukambausi Mupati wa Leza, Jesu, cakamugwasya kuzinzibala kuyeeya. Andiswe cilakonzya kutugwasya.