Tweelede Kukkazyika Moyo Mumulimo Wesu Wakukambauka
1. Mbuti Jehova mbwatondezya kukkazyika moyo kubantu?
1 Leza ulabakkazikila moyo bantu boonse. (Kul. 34:6; Int. 106:41-45; 2 Pe. 3:9) Nzila yomwe iitondezya kuti Leza ulakkazyika moyo ilalibonya kwiinda mumulimo wa Bwami uukambaukwa munyika yoonse. Jehova wali kubeleka abantu kwamyaka iitandila ku 2,000, alimwi ucizumanana kukwela bantu bayanda kuba acilongwe anguwe. (Joh. 6:44) Mbuti mulimo wesu mboukonzya kutondezya kukkazyika moyo kwa Jehova?
2. Mbuti mbotukonzya kutondezya bube bwakukkazyika moyo ciindi notubelekela mucilawo cesu?
2 Mulimo Wakuŋanda Aŋanda: Tulabwiiya bube bwa Jehova bwakukkazyika moyo kwiinda mukukambauka “cakutaleka” mucilawo bantu mobatatondezyi luyandisyo. (Mil. 5:42) Cakukkazyika myoyo tulaliyumya notusampaulwa, alimwi anotukazyigwa mumulimo wesu. (Mk. 13:12, 13) Alimwi tulatondezya kukkazyika myoyo kwiinda mukuzumanana mumulimo wesu wakutilila mbuto yakasimpe nokuba kuti cilakatazya kujana bantu bajisi luyandisyo mumaanda.
3. Nkaambo nzi kukkazyika moyo ncokuyandika ciindi notucita nyendo zyakupilukila alimwi anotweendelezya ziiyo zya Bbaibbele?
3 Ziiyo zya Bbaibbele: Kukomezya cisyango kuyandika kukkazyika moyo. Tulakonzya kucilanganya kabotu, pele tatukonzyi kucisinikizya kukomena. (Jak. 5:7) Mbubwenya buyo, kukomena kumuuya kulacitika asyoonto-syoonto. (Mk. 4:28) Aabo mbotwiiya limwi Bbaibbele cilakonzya kubayumina kuleka kusyoma njiisyo zyabukombi bwakubeja naa kuleka kucita ziyanza zitali zyamumagwalo. Tatweelede kubasungilizya basikwiiya Bbaibbele kukomena kumuuya kwiinda mukubasikinizya kuleka micito mibi. Kukkazyika moyo kulayandika kutegwa muuya wa Leza ubeleke mumoyo wasikwiiya.—1 Ko. 3:6, 7.
4. Mbuti kukkazyika moyo mbokukonzya kutugwasya kuzwidilila notukambaukila banamukwasyi batasyomi?
4 Banamukwasyi Batasyomi: Nokuba kuti tuliyandide kuti banamukwasyi batasyomi baiye kasimpe, tulatondezya kuti tulakkazyika moyo kwiinda mukulindila ciindi ceelede cakubaambila nzyotusyoma, alimwi akutabaambila twaambo tunji aciindi comwe. (Muk. 3:1, 7) Muciindi caboobo, tweelede kulekela micito yesu kuti itondezye bwini mbotubede akaambo kakasimpe. (1 Pe. 3:1, 15) Masimpe, kukkazyika moyo mumulimo wesu wakukambauka kuyootugwasya kuzwidilila alimwi kuyoomukkomanisya Tateesu wakujulu.