Mbuto Zyeelede Kutilailwa Kutegwa Zikomene
1. Ncinzi ceelede kutilailwa kutegwa cikomene?
1 Mbuto zisyangidwe mumuunda zyeelede kutilailwa kutegwa zikomene. Ncimwi buyo ambuto zyakasimpe zisyangidwe mumyoyo yabantu bali mucilawo cesu. (1 Ko. 3:6) Tweelede kupilukila akutilaila mbuto eezyi zyacikozyanyo kwiinda mukubelesya Jwi lya Leza kuti katuyanda kuti zikomene kabotu.
2. Mbuti mbotukonzya kugwasya mukamwini ŋanda kuti acikkomanine ncotuyakubandika twaakumuswaya alimwi?
2 Amubuzye Mubuzyo: Ciindi nomulibambila nzyomuyakwaamba, amulibambile amubuzyo uukkomanisya ngomuyooyingula mulweendo lwanu lwakupilukila. Mwamana kubandika ciindi cakusaanguna, amumubuzye mubuzyo akupangana buzuba mbomuyoopilukila kuyooyingula mubuzyo ooyo. Banji bajana kuti cilagwasya kusala makani amwi kuzwa mubbuku lya Bbaibbele Ncoliyiisya aayoobagwasya kutondezya mbocicitwa ciiyo ca Bbaibbele.
3. Ino ntwaambo nzi ntomweelede kubikkilizya nomulemba nzyomwakacita mulweendo lwakusaanguna?
3 Amulembe: Mbomwamanina buyo kubandika amukamwini ŋanda mulweendo lwakusaanguna, amulembe zyoonse nzyomwabandika. Amulembe zyina alimwi akkeyala yakwe. Alimwi cilayandika kulemba deeti aciindi nomwakabandika anguwe, anzyomwakabandika, alimwi amabbuku kuti naa kuli ngomwakamusiila. Sena kuli naakaamba kuti kuli nkwakomba? Sena ulaamukwasyi? Sena kuli naakaamba zyintu zimukkomanisya alimwi anzyalibilika? Twaambo tuli boobu tuyoomugwasya kubandika twaambo tuyandika kapati kulinguwe ciindi mwaakupilukila. Alimwi amulembe buzuba mbomwazuminana kuyoopilukila amubuzyo ngomuyakwiingula.
4. Nkaambo nzi ncotweelede kuzumanana kupilukila kuyoobandika abantu bakatondezya luyandisisyo kumulumbe wesu?
4 Amuzumanane: Saatani uyakuzumanana kuyanda ‘kulibweza jwi’ lyakasyangwa mumoyo wamuntu. (Mk. 4:14, 15) Aboobo, ciindi nomupilukila kumuntu wakatondezya luyandisisyo, mutatyompwi kuti naa tamumujani aŋanda. Sena inga mwamutumina lugwalo naa kulusiya amulyango? Mupainiya umwi wakatalisya ciiyo kumukaintu umwi kabaimvwi amulyango waŋanda, pele ciindi naakali kupilukila taakwe naakali kumujana aŋanda, aboobo wakamulembela lugwalo. Ciindi mukaintu ooyu naakajanika aŋanda, wakamulumba kapati mucizyi akaambo kakumubikkila maano nkwaakacita. Mbotuyaabutilaila mbuto zyakasimpe, tulakonzya kujana lukkomano luboola akaambo kakuzibona kazisyuuka, kaziyaabukomena kusikila zyasima, alimwi “akuzyala micelo iili makumi otatwe, makumi aali cisambomwi, alimwi amwaanda.”—Mk. 4:20.