Bube Buyandika Kapati bwa Mwiiyi Mubotu
1. Ino mbube nzi buyandika kapati bwa mwiiyi mubotu?
1 Ncinzi cipa kuti umwi kayiisya kabotu Bbaibbele? Sena ndwiiyo lwakumubili naa nkaambo kakuti wakatalika kaindi kuyiisya naa mbusongo bwakuzyalwa ambubo? Mubwini, mbobube mbubwenya buzuzikizya Mulawo, ibuzyibya basikwiiya ba Jesu, ibulibonya kapati alimwi ibukkomanisya akati kabube bupati bwa Jehova. (Joh. 13:35; Gal. 5:14; 1 Jo. 4:8) Nduyando. Bamayi bayiisya kabotu balatondezya luyando.
2. Nkaambo nzi ncotweelede kubayanda bantu?
2 Amubayande Bantu: Mwiiyi Mupati, Jesu, wakabatondezya luyando bantu, alimwi eeci cakabakulwaizya kuti bamuswiilile. (Lk. 5:12, 13; Joh. 13:1; 15:13) Ikuti katubabikkila maano bantu, tunookambauka kufwumbwa ciindi. Buyumuyumu buli mbuli kupenzyegwa alimwi akutabikkila maano kwabantu takukatulesyi kukambauka. Tuyoobabikkila maano aabo mbotukambaukila, alimwi tuyoobakambaukila kweelana azyintu nzyobabikkila maano. Tunoolibambilide kujana ciindi, kutali buyo cakuba asikwiiya Bbaibbele umwi aumwi pele acakulibambilila limwi ciiyo cimwi acimwi ncotuyakwiiya.
3. Ino kuyanda kasimpe kamu Bbaibbele inga kwatugwasya buti mumulimo wakukambauka?
3 Amukayande Kasimpe Kamu Bbaibbele: Kunze lyaboobo, Jesu wakali kukayanda kasimpe kamu Bbaibbele alimwi wakakabona kuti ncintu ciyandisi. (Mt. 13:52) Ikuti katukayanda kasimpe, tunakwaambaula cabusungu alimwi inga cabakkomanisya baswiilizi. Luyando luli boobu luyakutugwasya kubikkila maano kutwaambo tuyandika kapati ntotwaambila bantu muciindi cakubikkila maano kuzyintu nzyotulezya, alimwi eeci inga capa kuti katutalibiliki kapati notuli mumulimo wakukambauka.
4. Mbuti mbotukonzya kuba aluyando?
4 Amube Aluyando: Mbuti mbotukonzya kubayanda bantu? Kwiinda mukuzinzibala kuyeeya luyando lwa Jehova a Mwanaakwe, alimwi akubona bantu bali mucilawo cesu mbobayandika kugwasyigwa kumuuya. (Mk. 6:34; 1 Jo. 4:10, 11) Kusitikila kucita ciiyo cesu tobeni alimwi akuzinzibala kuyeeya kuyoopa kuti tukayandisye kasimpe kamu Bbaibbele. Luyando ncibeela camucelo wamuuya. (Gal. 5:22) Aboobo, tulakonzya kumulomba Jehova kuti atupe muuya uusalala alimwi akutugwasya kuti tukomene muluyando. (Lk. 11:13; 1 Jo. 5:14) Tacikwe makani alwiiyo lwesu lwakumubili, naa akaambo kakuti twakakaiya kaindi kasimpe, naa busongo bwakuzyalwa ambubo, tulakonzya kuba bayi bacibwene kuyiisya Bbaibbele kwiinda mukutondezya luyando.