Amwaakwabilile Manjezyeezya Aanu
1. Ino muswaangano waalubazu wamwaka wamulimo wa 2013 ujisi mutwe nzi, alimwi pulogilamu iyootugwasya buti?
1 Buzuba abuzuba kuli zyintu zicitika zikonzya kunyonganya manjezyeezya eesu. Nkakaambo kaako pulogilamu yamuswaangano waalubazu yamwaka wamulimo wa 2013, iiyootalika mu September 1, 2012, ijisi mutwe wakuti “Amwaakwabilile Manjezyeezya Aanu.” (1 Ti. 1:19) Pulogilamu yabambwa munzila iikonzya kutugwasya toonse kulanga-langa mbotucibelesya cipego eeci citaliboteli cizwa ku Mulengi wesu.
2. Ino mibuzyo nzi mipati-pati iyooingulwa mupulogilamu?
2 Amulangile Twaambo Ootu: Mupulogilamu kuyooingulwa mibuzyo mipati-pati iili ciloba iijatikizya manjezyeezya:
• Ncinzi cikonzya kubikka manjezyeezya eesu muntenda?
• Ino manjezyeezya eesu inga twaayiisya buti?
• Ino inga cakonzyeka buti kusalala kubulowa bwabantu boonse?
• Ino mbotuyeeya alimwi ambotucita zyintu kweelana anjiisyo zyamu Bbaibbele citondezya kuti tuli bantu bali buti?
• Ncinzi ncotweelede kucita kutegwa tutanyonganyi manjezyeezya aabamwi?
• Nobana, ino inga mwaliyumya buti ciindi nomusinikizyigwa kucita cintu ncomuzyi kuti taciluzi?
• Ino nzilongezyo nzi nzyobajana aabo batobela manjezyeezya aabo aasololelwa amuuya?
3. Ino pulogilamu iyakutugwasya buti?
3 Kwiinda mukugwasyigwa a Jehova, tulakonzya kumukazya Saatani nayanda kunyonganya manjezyeezya eesu. Kwiinda mu Jwi lya Leza alimwi ambunga yakwe, Taateesu siluyando wakujulu utwaambila kuti: “Njeeyi inzila, amweende mulinjiyo.” (Is. 30:21) Pulogilamu eeyi ninzila imwi Jehova njabelesya kutusololela. Aboobo, amulibambile kuyoojanika kupulogilamu yoonse. Amukabikkile maano, alimwi akubona mbomukonzya kutubelesya twaambo tuyooyiigwa. Amukabandike amukwasyi kujatikizya pulogilamu. Ikubelesya malailile ngotutambula ciyootugwasya kuzumanana “kuba amanjezyeezya mabotu” alimwi akutakuzumizya zyintu zikondelezya zyamunyika ya Saatani kutuyunga kucita cintu cikonzya kunyonganya cilongwe cesu a Jehova.—1 Pe. 3:16.