Amujane Lukkomano Mumulimo Wanu Ngomubekeleka Canguzu
1. Ncinzi cikonzya kutupa kuleka kusungwaala mumulimo?
1 Muntu wakalengwa kuti ‘kalikondezya mumilimo yakwe.’ (Muk. 2:24) Nokuba boobo, ciindi notwaalilwa kujana bubotu mumulimo wesu, kutyompwa kulakonzya kutupa kubula lukkomano alimwi akuleka kusungwaala. Ino ncinzi cikonzya kutugwasya kuzumanana kuzilanga munzila yeelede zyintu?
2. Nkaambo nzi ncotuteelede kulangila zyintu zitakonzyi kucitika kujatikizya bantu mbobautambula mulumbe mumulimo wesu?
2 Mutalangili Zyintu Zitakonzyi Kucitika: Amuyeeye kuti, nokuba kuti bantu bakautambula mulumbe wa Jesu bakali basyoonto, tacidoonekwi kuti mulimo wakwe wakazwidilila. (Joh. 17:4) Mucikozyanyo cakwe casikuminza, Jesu wakaambilalimwi kuti myoyo yabantu banji taikatambuli mulumbe wa Bwami uuli mbuli mbuto. (Mt. 13:3-8, 18-22) Nokuba boobo, kubeleka kwesu cabusungu kulagwasya kapati.
3. Mbuti mbotukonzya “kuzyala micelo” nokuba kuti bantu mbasyoonto babikkila maano kumulumbe ngotukambauka?
3 Mbotuzyala Micelo Minji: Kweelana acikozyanyo ca Jesu, bantu aabo bautambula mulumbe ‘balazyala micelo.’ (Mt. 13:23) Ciindi maila naakomena akusima, micelo ngaazyala tatuli tukuba tusyoonto-syoonto twamaila pe, pele ninseke zipya. Aboobo, micelo njobazyala Banakristo ibazwidilila, tabali basikwiiya bapya pe, pele nimbuto zya Bwami zipya zinji zisyangwa cakwiinduluka-induluka—nkokuti kwaambilizya makani mabotu aa Bwami. Eeci citupa kujana “bubotu” bwalo bukonzya kutupa kukkutila, nokuba kuti bantu tababikkili maano kumulumbe. Tulagwasyilizya mukusalazyigwa kwa zyina lya Jehova. (Is. 43:10-12; Mt. 6:9) Tulacikkomanina coolwe cakuba basimilimonyina a Leza. (1 Ko. 3:9) Alimwi “micelo yamilomo” iili boobu ilamukkomanisya Jehova.—Heb. 13:15, 16.
4. Mbubotu nzi mbotutakonzyi kuzyiba bujanika mumulimo wesu?
4 Kunze lyaboobo, kubeleka kwesu canguzu inga kwaleta mpindu nzyotutakonzyi kubona. Kulangilwa kuti Bantu bamwi bakamvwa Jesu kakambauka tiibakaba basikwiiya bakwe kusikila ciindi naakamanizya mulimo wakwe waanyika. Mbubwenya buyo, mbuto zya Bwami nzyotusyanga tazikonzyi kukomena mumoyo wamuntu mane kusikila kwainda ciindi, alimwi ulakonzya kuboola mukasimpe katutazyi. Masimpe, mulimo wesu uzuzikizya zyintu zinji zibotu. Aboobo, ‘atuzumanane kuzyala micelo minji’ akulitondezya kuti tuli basikwiiya ba Jesu.—Joh. 15:8.