Amutobele Cikozyanyo Cabasinsimi—Jona
1. Ino Jona wakajisi bube bubotu buli buti?
1 Ncinzi ciboola mumizeezo yanu mwayeeya musinsimi Jona? Bamwi balakonzya kwaamba kuti wakali mukandu naa muyumu moyo. Nokuba boobo, wakatondezya kuti wakali kulicesya, wakali sicamba, alimwi wakali amuuya wakulyaaba. Mbuti mbotukonzya ‘kutobela cikozyanyo’ cabube bubotu bwa Jona?—Jak. 5:10.
2. Mbuti mbotukonzya kwiiya kulicesya kwa Jona?
2 Kulicesya: Jona wakasaanguna kuccijila kumbi muciindi cakuunka kubusena nkwaakatumidwe. Eeci tacigambyi nkaambo bana Asuri bakali basilunya, alimwi Nineve wakazooitwa kuti “munzi wabulowa.” (Nah. 3:1-3) Nokuba boobo, Jehova wakamululamika Jona iwakatondezya kulicesya kwiinda mukuubeleka mulimo ciindi naakapegwa coolwe alimwi. (Tus. 24:32; Jon. 3:1-3) Nokuba kuti wakasaanguna kuwayawaya, wakacita kuyanda kwa Jehova. (Mt. 21:28-31) Sena andiswe tulikanzide kukambauka makani mabotu, nokuba kuti twasubulwa, naa kuti cilawo ncotukambaukila cilakatazya?
3. Ino nzibeela nzi zyamulimo wanu ziyandika busicamba amuuya wakulyaaba?
3 Busicamba Amuuya Wakulyaaba: Ciindi Jona naakazyiba kuti kusala kwakwe kutali kabotu kwakabikka buumi bwa basibwato muntenda, wakalilibambilide kwaaba buumi bwakwe. (Jon. 1:3, 4, 12) Mukuya kwaciindi, naakali kubeleka mulimo ngwaakapegwa kubeleka ku Nineve, wakanjila akati eeni aamunzi, ambweni wakali kuyandaula busena bubotu bwakwaambilizya lubeta lwa Jehova. Oobu mbwaakacita musinsimi sicamba wa Leza, tanaakali mukandu pe! (Jon. 3:3, 4) Ino mbuti swebo mazuba aano? Busicamba buzwa kuli Leza bulayandika kutegwa tupe bumboni cabusicamba ciindi notukazyigwa. (Mil. 4:29, 31) Muuya wakulyaaba ulayandika kutegwa tubelesye ciindi alimwi azyintu zyesu mumulimo.—Mil. 20:24.
4. Nkaambo nzi ncotweelede kujana ciindi cakuzinzibala kuyeeya cikozyanyo cibotu ncobakatondezya basinsimi ba Jehova?
4 Lyoonse mwanoobala cibalo camusinsimi wa Jehova umwi, munoogwasyigwa kapati kuti kamweezyeezya kuti muli mubukkale oobo. Amulibuzye kuti: ‘Ino nindakacita buti? Mbuti mbondikonzya kwiiya bube bwakwe bubotu mubuumi bwangu?’ (Heb. 6:11, 12) Zibalo zili kumbele mu Mulimo Wesu wa Bwami ziyoolanga-langa ziiyo zimwi ziyandika nzyotukonzya kwiiya kubasinsimi bamwi ba Jehova basyomeka.