Kabbokesi Kamubuzyo
◼ Ino ninjiisyo nzi zyamu Bbaibbele zibeleka caboola kumakani aakubelesya mafooni aamumaanza ciindi camiswaangano ya Bunakristo alimwi amumulimo wamumuunda?
“Zintu Zyoonse Zilijisi Ciindi Cazyo.” (Muk. 3:1): Mafooni aamumaanza apa bantu coolwe cakubandika naa kulembela bantu bamwi tugwalo aciindi cili coonse. Nokuba boobo, kuli ciindi Banakristo nobateelede kunyonganizyigwa afooni yabo. Mucikozyanyo, miswaangano yesu nciindi cakukomba Jehova, kutambula lwiiyo lwakumuuya, alimwi akuyumizyanya. (Dt. 31:12; Int. 22:22; Lom. 1:11, 12) Tulakonzya kwiizima fooni notwasika kumiswaangano mpoonya akubala tugwalo yamana miswaangano. Ikuti naa katulangila cintu cimwi cacibukilambuta iciyandika kuti tutaizimi fooni, tweelede kwiibambila limwi kutegwa itanyonganyi bantu.
‘Kamucita Zyintu Zyoonse Akaambo Kamakani Mabotu.’ (1 Ko. 9:23): Zimwi ziindi, kuli twaambo tuyandika ncotubelesya fooni yamumaanza mumulimo wamumuunda. Mucikozyanyo, mukwesu weendelezya ulakonzya kwiibelesya kulanga baabo bali mubukambausi muzibeela zimwi zyacilawo. Zimwi ziindi basikumwaya babelesya fooni yamumaanza kutumina muntu uulaaluyandisisyo naa muntu ngobayiisya Bbaibbele kabatana kumuswaya, kwaambisya kuti muntu ooyo kakkala kulamfwu. Ikuti katujisi fooni, tweelede kubikkila maano kuti itanootunyonganyi notubandika abamukamwini ŋanda. (2 Ko. 6:3) Ciindi notulindila basikumwaya bambi, muciindi cakutuma fooni naa kulemba tugwalo kubeenzuma, inga cabota kubikkila maano kumulimo wamumuunda alimwi akulibaabo mbotubeleka limwi.
Amubabikkile Maano Bantu. (1 Ko. 10:24; Flp. 2:4): Tatuyandi kuba acilengwa cakumuka kumiswaangano yakulibambila kuunka mumulimo wamumuunda katujisi muzeezo wakuti tulakonzya kutuma fooni naa kulemba kagwalo kaafooni kumuntu umwi kubuzya busena nkokakambaukila kabunga. Ciindi notwamuka kusika, kanji-kanji kulaba kucinca-cinca mbobatiibeleke bantu. Masimpe, zimwi ziindi tulakonzya kumuka akaambo kazyintu nzyotutakonzyi kucinca. Pele kuti twaba acilengwa cakufwambaana kusika, tutondezya kuti tulamubikkila maano Jehova, mukwesu weendelezya, alimwi abasikumwayama.