Amutobele Cikozyanyo Cabasinsimi—Amosi
1. Ino Nkaambo nzi cikozyanyo ca Amosi ncocikonzya kutukulwaizya?
1 Sena kuli nomwakalimvwide kuti tamweeleli kukambauka akaambo kakuti mwakakomenena mumukwasyi uunyina mpuwo alimwi akuti tamuyiide kapati? Ikuti kakuli boobo, mulakonzya kukulwaizyigwa acikozyanyo ca Amosi. Nokuba kuti wakali buyo mweembezi alimwi wakali kubeleka mulimo uucitwa buyo ziindi zimwi mumwaka, Jehova wakamupa nguzu zyakukambauka mulumbe uuyandika kapati. (Am 1:1; 7:14, 15) Naaba mazuba aano, Jehova ubelesya baabo ibalicesya. (1 Ko. 1:27-29) Ino nziiyo nzi zimbi kujatikizya mulimo wamumuunda nzyotukonzya kumwiiya musinsimi Amosi?
2. Nkaambo nzi ncotukonzya kuzumanana kuyuma ciindi notukazyigwa mumuunda?
2 Amuzumanane Kuyuma Nomukazyigwa: Ciindi Amaziya, mupaizi iwakali kukomba moombe mubwami bwa Israyeli bwakunyika ibwamisyobo iili kkumi, naakamvwa businsimi bwa Amosi, wakaingula cabukali, mubwini wakali kwaamba kuti: ‘Koya kuŋanda! Kotuleka! Tulijisi bukombi bwesu!’ (Am. 7:12, 13) Amaziya wakaapilinganya majwi aamusinsimi naakali kulomba Mwami Jeroboamu kuti alesye mulimo wa Amosi. (Am. 7:7-11) Pele Amosi tanaakayoowa. Mazuba aano, basololi bazikombelo bamwi bayandaula lugwasyo kuzwa kubaleli bazisi kutegwa bapenzye bantu ba Jehova. Nokuba boobo, Jehova utusyomezya kuti kunyina cilwisyo cipangilwa kulwisya ndiswe iciyakuzwidilila pe.—Is. 54:17.
3. Ino mulumbe ngotwaambilizya mazuba aano ujisi zibeela nzi zyobilo?
3 Amwaambilizye Lubeta lwa Leza Alimwi Azilongezyo Ziboola Kumbele: Nokuba kuti Amosi wakasinsima lubeta lwabwami bwa Israyeli bwakunyika ibwamisyobo iili kkumi, wakamanizya kulemba bbuku lyamu Bbaibbele ilijisi zyina lyakwe kwiinda mukwaamba cisyomezyo ca Jehova cakubambulula alimwi azilongezyo zinji. (Am. 9:13-15) Andiswe tulaambilizya kuboola ‘kwabuzuba bwalubeta’ lwa Leza, pele eeci ncibeela buyo ‘camakani mabotu aa Bwami’ ngotweelede kwaambilizya. (2 Pe. 3:7; Mt. 24:14) Nzila iisololela kunyika yaparadaiso iyoojaluka ciindi Jehova aakunyonyoona bantu babi lya Amagedoni.—Int. 37:34.
4. Ino ndusyomo nzi ndotujisi lwakuti inga twazuzikizya kuyanda kwa Jehova?
4 Kukambauka makani aa Bwami munyika muli bantu banji basikukazya, cisunka kulyaaba kwesu kuli Jehova alimwi akucita kuyanda kwakwe. (Joh. 15:19) Nokuba boobo, tulisinizyide kuti Jehova uyoozumanana kutugwasya kweelela kuzuzikizya kuyanda kwakwe mbubonya mbwaakacita kuli Amosi.—2 Ko. 3:5.