Kabbokesi Kamubuzyo

◼ Sena sikumwaya mucizyi weelede kusama citambala nasololela ciiyo ca Bbaibbele cicitilwa anze kumwi kabaimvwi nabeleka asikumwaya mukwesu?

Ciindi sikumwaya mucizyi nasololela ciiyo ca Bbaibbele caaŋanda kabali asikumwaya wa Bwami mukwesu, mucizyi weelede kusama citambala. (1 Ko. 11:3-10) Ngazi Yamulindizi yamu Cingisi ya July 15, 2002 apeeji 27 yakapandulula kuti: “Oobu mbubambe bwakuyiisya muntu bucitwa lyoonse alimwi ibweendelezyegwa amwini ciiyo. Mubukkale oobu ciiyo cicitwa ncibeela cabubambe bwakuyiisya mumbungano. Ikuti mucizyi uubbapatizyidwe usololela ciiyo eeci kabali amukwesu uubbapatizyidwe, mucizyi weelede kusama citambala.” Ncimwi buyo kuti kali asikumwaya mukwesu uutanabbapatizyigwa. Oobu mboceelede kuba nokuba kuti ciiyo cicitilwa muŋanda, anze kumwi kabaimvwi, naa mubukkale bumbi buyo.

Kulubazu lumbi, kuti ciiyo cicitilwa anze kumwi kamwiimvwi tacinasitikila, inga tiikwayandika kuti mucizyi asame citambala ciindi nabeleka asikumwaya mukwesu nokuba kuti makanze aakupilukila ngakutondezya mbocicitwa ciiyo ca Bbaibbele naa ikwiiya kubelesya mabbuku eesu aabelesyegwa mukucita ciiyo. Mbwaanga ziiyo zicitilwa anze kumwi kamwiimvwi tazisitikili mpoonya-mpoonya, pele zilasitikila kwiinda mukucita nyendo zyakupilukila zili mbozibede, basikumwaya beelede kulanga bukkale kutegwa bazyibe naa cileelela kusama citambala.