Mbomukonzya Kulibambila Ntalisyo Zibeleka Kabotu
1. Nkaambo nzi ncociyandika kuba antalisyo mbotu yamubandi?
1 Mbubwenya mbuli cakulya cantalisyo cinunkilila mbocitupa kulangila cakulya citobela, ntalisyo mbotu ipa kuti tube amubandi mubotu wamu Magwalo. Ntalisyo yamibandi iibeleka kabotu ilakonzya kwiindana-indana mubulamfwu alimwi amakani aambwa, pele mbubwenya mbuli kujika cakulya cinona, lyoonse cilayandika kusaanguna kulibambila. (Tus. 15:28) Ncinzi ciyandika kutegwa tube antalisyo mbotu yamubandi?
2. Mbuti mbotukonzya kulibambila ntalisyo iikonzya kubakkomanisya bantu?
2 Amusale Makani Aabakkomanisya Bantu: Majwi eesu aantalisyo ayelede kukulwaizya bantu kuba aluyandisisyo, buyo-buyo mukamwini ŋanda inga waukosola mubandi. Aboobo, nomulibambila, amuyeeye zyintu zikonzya kubakkomanisya bantu bali mucilawo canu. Sena bantu bali mucilawo balakkomana kubandika makani aajatikizya mfwulumende mbotu, buumi bwamumukwasyi bukkomanisya, naa kumana kwankondo? Bunji bwabantu balayanda kwaamba mbobayeeya, aboobo amulibambile mubuzyo uukonzya kupa kuti muntu aambe mbwayeeya. Mulakonzya kubelesya ntalisyo yomwe akati kantalisyo izili mu Mulimo Wesu wa Bwami akwiicinca kweelana acilawo canu. Alimwi ciindi aciindi mulakonzya kucita zitondezyo kwiinda mukubelesya ntalisyo zimwi ciindi nomukomba mumukwasyi.
3. Mbuti mbotukonzya kucinca ntalisyo yesu kutegwa yeendelane azilengwa alimwi abukkale bwabantu bali mucilawo cesu?
3 Amubikkile Maano Kuzilengwa Abukkale: Mumasena amwi, tweelede kwaamba ncotwaswayila kakunyina kusowa ciindi. Mumasena aamwi, citondezya kubula bulemu ikuti mweenzu tanaasaanguna kwaanzya mukamwini ŋanda naa kubuzya mboubede mukwasyi. Muzilawo zimbi tulaangulukide kubelesya Bbaibbele mumajwi eesu aantalisyo, akaambo kakuti bantu mbakombi. (Mil. 2:14-17) Pele, oomo munyina zikombelo zya Banakristo, naa bantu mobatakombeli limwi, ambweni inga cabota kubelesya Bbaibbele mulweendo lwakupilukila muciindi cakulibelesya mulweendo lwakusaanguna.—Mil. 17:22-31.
4. Ino nzyintu nzi nzyotweelede kubikkila maano mumajwi eesu aantalisyo?
4 Majwi Aantalisyo: Amulibambile kabotu majwi aanu aantalisyo. Kanji-kanji, kwaamba majwi masyoonto aatakatazyi kumvwa cilagwasya kapati. Alimwi mbotwaamba majwi aantalisyo, acalo cilagwasya. Kamusangalizya. Kamumweta-mweta munzila iitondezya kuti mulamubikkila maano mukamwini ŋanda. Kutobela nzila eezyi kuyootugwasya kulibambila majwi aantalisyo aakkomanisya aayookulwaizya bantu bamucilawo cesu kulida “atebulu lya Jehova.”—1 Ko. 10:21.