Amutobele Cikozyanyo Cabasinsimi—Zefaniya
1. Ino Zefaniya wakabeleka mulimo wabusinsimi mubukkale buli buti, alimwi mbuti mbwali cikozyanyo cibotu kulindiswe mazuba aano?
1 Mwakali mumwanda wamyaka waakati-kati waciloba B.C.E, alimwi bukombi bwa Baala bwakali dumide kapati mu Juda. Mwami mubi Amoni wakajaigwa, aboobo lino Mwami Josiya nguwakali kulela. (2 Mak. 33:21–34:1) Aciindi eeci, Jehova wakapa Zefaniya mulimo wakwaambilizya mulumbe wakwe walubeta. Nokuba kuti Zefaniya wakali wamuŋanda yamwami, kunyina naakaubya-ubya mulumbe wa Jehova wakukaka bweendelezi bwaba Juda. (Zef 1:1; 3:1-4) Mbubwenya buyo, tulasolekesya kwiiya busicamba bwa Zefaniya alimwi akweeleba kuzumizya zibbululu kutunyonganya kukomba Jehova. (Mt. 10:34-37) Ino mulumbe nzi Zefaniya ngwaakaambilizya alimwi ncinzi cakatobela?
2. Ino nintaamu nzi njotweelede kubweza kutegwa tukasiswe mubuzuba bwabukali bwa Jehova?
2 Amuyandaule Jehova: Jehova alikke nguukonzya kufwutula bantu mubuzuba bwabukali bwakwe. Aboobo Zefaniya wakakulwaizya bantu kuyandaula Jehova, kuyandaula bululami, alimwi akuyandaula lubombo. (Zef. 2:2, 3) Ncimwi buyo amazuba aano. Mbubonya mbuli Zefaniya, tukulwaizya bantu kuyandaula Jehova, pele andiswe tweelede kubweza ntaamu, katusinizyide ‘kutaleka kutobela Jehova.’ (Zef. 1:6) Aboobo, tulamuyandaula Jehova kwiinda mukwiiya Jwi lyakwe alimwi akupailila busolozi bwakwe. Tuyandaula bululami kwiinda mukupona buumi bwakulilemeka kabotu. Tuyandaula lubombo kwiinda mukuba bantu bamvwida alimwi balibambilide kutambula busolozi buzwa mumbunga ya Jehova.
3. Nkaambo nzi ncotweelede kuzumanana kuulanga kabotu mulimo wakukambauka?
3 Bubotu Ibwakajanika: Mulumbe walubeta wa Zefaniya wakabakulwaizya bantu bamwi mu Juda, kapati mukubusi Josiya walo iwakatalika kumuyandaula Jehova naakacili mulombe. Mukuya kwaciindi, Josiya wakaambilizya cabusungu kuti bukombi bwamituni bugwisyigwe mucisi. (2 Mak. 34:2-5) Mazuba aano, nokuba kuti mbuto zimwi zya Bwami ziwida mumbali aanzila, mubulongo bujisi mabwe, naa mumamvwa, pele kuli azimwi ziwida mubulongo bubotu alimwi zilazyala micelo. (Mt. 13:18-23) Tulaalusyomo lwakuti Jehova ulazumanana kutulongezya notuzumanana kubeleka canguzu kumwaya mbuto ya Bwami.—Int. 126:6.
4. Nkaambo nzi ncotweelede kuzumanana ‘kulindila Jehova’?
4 Bantu bamwi mu Juda bakali kuyeeya kuti Jehova taakwe naakali kuyoobweza ntaamu. Nokuba boobo, Jehova wakabasyomezya boonse kuti buzuba bwakwe bupati bwakali aafwaafwi. (Zef. 1:12, 14) Bakali kuyoofwutuka mbaabo buyo bakali kuyooccijila kulinguwe. (Zef. 3:12, 17) Mbotuyaabuzumanana ‘kulindila Jehova,’ atujane lukkomano mukubelekela antoomwe abakombima ba Leza wesu mupati!—Zef. 3:8, 9.