Mwaanda Wamyaka Wakwaambilizya Bwami!
1. Ino ncinzi bantu ba Jehova ncobakakulwaizyigwa kucita afwaafwi amyaka iili 100 iyainda?
1 “Ngooyo Mwami ulalela! Nywebo ndinywe baambilizi bakwe. Aboobo amwaambilizye, amwaambilizye, amwaambilizye Mwami abwami bwakwe.” Kwiinda mumajwi aakulwaizya aakaambwa a Mukwesu Rutherford myaka iitandila kumwaanda, bantu ba Jehova bakakulwaizyigwa kwaambilizya mulumbe wa Bwami nyika yoonse. Eeci ncotwacita andiswe! Mbubonya mbuli Banakristo bakusaanguna, twakambauka makani mabotu aa Bwami “kuzilenge zyoonse zili ansi aajulu.” (Kol. 1:23) Twalanga musyule kumwaanda iwainda, ino ncinzi ncotwacita mukwaambilizya Bwami bwa Leza? Ino mbuti mbotukonzya kuzumanana kwaambilizya Bwami mboili afwaafwi kukkwana myaka ili 100 kuzwa Bwami nobwakazyalwa?
2. Ino mbuti mabbuku eesu mbwaasumpula Bwami bwa Leza?
2 Kulanga Musyule: Kwamyaka minji, mabbuku eesu asumpula Bwami bwa Leza. Kuzwa mu 1939 kusikila sunu, magazini yesu iiyandika kapati ijisi mutwe wakuti: Ngazi Yamulindizi Yaambilizya Bwami bwa Jehova. Lyoonse magazini eeyi ilabandika kujatikizya Bwami alimwi ancobuyoocita. Ayalo Magazini ya Sinsimuka! ilabandika Bwami bwa Leza kuti mbobulangizi bulikke bwabanamaleya. Eelo kaka cileelela kuti mamagazini aaya obilo ngainda kusandululwa alimwi akumwaigwa munyika!—Ciy. 14:6.
3. Ino ninzila nzi zimwi nzyotwabelesya kutegwa twaambilizye Bwami?
3 Bantu ba Jehova balikubelesya nzila ziindene-indene kwaambilizya Bwami. Kumatalikilo, twakali kubelesya myootokala iijisi zyakwaambawida, kubelesya sikapepele, alimwi amalekkoodi atakatazyi kunyamuna. Nzila eezyi zyakatugwasya kumwaya makani mabotu kubantu banji aciindi comwe nokwakali basikwaambilizya Bwami basyoonto. (Int. 19:4) Mumyaka misyoonto iyainda twamwaya makani a jw.org, eeci capa kuti Bwami bwaambilizyigwe kumamiliyoni aabantu—kubikkilizya akubantu ibali muzisi mobatauzumizyi mulimo wesu.
4. Ino ninzila nzi zyaalubazu nzyotwabelesya?
4 Alimwi Bantu ba Jehova babelesya nzila zyaalubazu kutegwa bamwaye mulumbe wa Bwami. Mucikozyanyo, kutalikila mumyaka yakuma 1995, twakasoleka kukomezya mulimo wesu wakuŋanda aŋanda kwiinda mukupa bumboni mumapaakki, mumasena musiilwa myootokala alimwi mucitilwa makwebo. Caino-ino, twakabamba bubambe bwaalubazu bwakukambauka kubuleya mumadolopo mapati nyika yoonse. Kuyungizya waawo, mbungano zinji zilatola lubazu mubukambausi bwakubuleya muzilawo zyabo kwiinda mukubelesya kakubikkila mabbuku kakukuba alimwi amatebulu aabikkwa mumasena mujanika bantu banji. Nokuba boobo, mulimo wakukambuka kuŋanda aŋanda tuubona kuti nenzila iiyandika kapati yakukambauka Bwami.—Mil. 20:20.
5. Ino nzyoolwe nzi nzyotunoojisi bunji bwesu mumwaka mupya wamulimo?
5 Kulanga Kumbele: Waakutalika mwaka wamulimo mupya mu September, banji bayootalika kubeleka kabali bapainiya baciindi coonse. Sena inga mwabasangana? Ikuti kamutakonzyi kucita oobo, sena inga mwalilembya bupainiya bwakugwasilizya ciindi aciindi? Tacikwe makani naa mulacikonzya kucita bupainiya naa pe, Jehova uyoomulongezya akaambo kakulyaaba kuli koonse nkomucita kutegwa mutole lubazu cakuzulila kwaambilizya Bwami.—Malk. 3:10.
6. Nkaambo nzi mwezi wa October 2014 ncouyooba waalubazu?
6 Myaka iili 100 kuzwa Bwami nobwakatalika kulela, iiyookkwana mumwezi wa October 2014. Aboobo cileelela kuti Ngazi Yamulindizi yakubuleya yamwezi ooyo iyoobikkila kapati maano kumakani aajatikizya Bwami bwa Leza. Eelo kaka inga cabota kusolekesya kwaabila bantu banji magazini eeyi! Mbotuyaabulanga kumbele, umwi aumwi wesu azumanane “kwaambilizya makani mabotu aa Bwami bwa Leza” kubantu boonse ibayooswiilila.—Mil. 8:12.