Amutobele Cikozyanyo Cabasinsimi—Nahumu
1. Ino bbuku lya Nahumu lituyiisya nzi?
1 Matongo aaku Nineve wansiku apa bumboni bwakuti Jehova ulabalwana basinkondonyina alimwi akuti nobaba basinkondo bayoosya kapati tabakonzyi kumuzunda, mbubwenya buyo musinsimi Nahumu mbwaakasinsima. (Nah. 1:2, 6) Mubusinsimi bwa Nahumu, kuli ziiyo zikonzya kutugwasya mumulimo wesu wakukambauka.
2. Mbuti mbotukonzya kuzumanana kwaambilizya mulumbe uukulwaizya?
2 Kamuumbulizya Akupa Bulangizi: Kuti twalibala cakufwambaana, bbuku lya Nahumu liboneka mbuli kuti lyaamba buyo zyamulumbe walunyonyooko kujatikizya Nineve, munzi mupati wa Asuri wansiku. (Nah. 1:1; 3:7) Nokuba boobo, bantu ba Jehova bakakutambula kwaambilizyigwa kwamulumbe ooyo. Nahumu, uujisi zina lyaamba kuti “Sikuumbulizya,” wakakulwaizya ba Judanyina kuti sinkondonyina wabo wakalaafwi kunyonyoonwa! Nahumu alimwi wakazumanana kwaambilizya kuti Jehova “macijilo mubuzuba bwamafwabi.” (Nah. 1:7) Notukambauka, andiswe twaambilizya makani mabotu akukulwaizya bantu kuccijila kuli Jehova.—Nah. 1:15.
3. Ino inga twamwiiya buti Nahumu mukubelesya zikozyanyo azitondezyo?
3 Amubelesye Zikozyanyo Alimwi Azitondezyo: Jehova wakasololela Nahumu kuti ayezyanisye mamanino aa Nineve kumamanino aa Tebesi waku Egepita (No-amoni), walo wakanyonyoonwa a Asuri. (Nah. 3:8-10) Notubandika abantu kujatikizya mamanino abweende bwazintu oobu bubyaabi, tulakonzya kwaamba businsimi bwamu Bbaibbele ibutondezya kuti Jehova ulazuzikizya jwi lyakwe munzila zyoonse. Mucikozyanyo, ciindi bana Babuloni abana Mediya nibakaboola kuti balwane munzi wa Nineve mu 632 B.C.E., Mulonga wa Tigris wakapaya akaambo kamvwula, akuwisya cibeela cimwi cabwaanda bwamunzi ibwakali buyumu kapati. Mpoonya Nineve wakanyonyoonwa cakufwambaana mbubonya mbuli Jehova mbwaakaamba.—Nah. 1:8; 2:6.
4. Ino inga twacita buti kutegwa kazilimvwisya nzyotuyiisya notuli mubukambausi?
4 Kazilimvwisya Nzyomuyiisya: Ndembelo ya Nahumu yakali yabupanduluzi alimwi yakali kujatikizya zintu zyakali kucitika. Nzyaakali kwaamba zyakali kulimvwisya. (Nah. 1:14; 3:1) Mbubonya buyo, andiswe tweelede kubelesya mwaambo uutakatazyi kumvwa. (1 Ko. 14:9) Mulweendo lwakusaanguna, amupandulule kabotu-kabotu kaambo ncomwaswaila. Nomwiiya Bbaibbele abamwi, amubagwasye kuba alusyomo muli Jehova alimwi amu Jwi lyakwe akubona mulumbe mbuubagwasya lwabo beni.—Lom. 10:14.
5. Ino nduumbulizyo nzi ndotujana mubusinsimi bwa Nahumu?
5 Lusyomo lwa Nahumu mujwi lya Jehova ilyakazuzikizyigwa cakutadooneka lulalibonya kabotu-kabotu mubbuku lijisi zina lyakwe. Mamanino aabweende bwa Saatani mbwaayaabuswena aafwaafwi, tulajana luumbulizyo mumulawo wa Leza wakuti: “Mapenzi taakooyoobuka lwabili.”—Nah. 1:9.