Amutobele Cikozyanyo Cabasinsimi—Habakuku
1. Ino ncinzi ncotukonzya kwiiya kumusinsimi Habakuku?
1 Nyika mboiyaabwiindila kubija, tulakonzya kulimvwa mbwaakalimvwa Habakuku, walo wakabuzya Jehova kuti: “Ino nkaambo nzi ncondipa kubona zintu zibi? Alimwi nkaambo nzi ncolekelela mapenzi kuti kaacitika?” (Hab. 1:3; 2Tim. 3:1, 13) Kuzinzibala kuyeeya mulumbe wa Habakuku alimwi acikozyanyo cakwe cakusyomeka kulakonzya kutugwasya notulindila buzuba bwalubeta bwa Jehova.—2Pet. 3:7.
2. Mbuti mbotukonzya kutondezya kuti tulapona kweelana alusyomo mazuba aano?
2 Amusyomeke: Muciindi cakutyompwa akaambo kazintu izyatakali kumweendela kabotu, Habakuku wakazumanana kupakamana kumuuya akuba musungu. (Hab. 2:1) Jehova wakasyomezya musinsimi kuti Jwi lyakwe liyoozuzikizyigwa muciindi ceelede alimwi akuti “mululami uyoopona akaambo kakusyomeka kwakwe.” (Hab. 2:2-4) Ino eeci cipandulula nzi ku Banakristo bapona muciindi camamanino? Cilayandika kapati kusinizya kuti mamanino ayoosika kwiinda kuzyiba ciindi cini naayoosika. Lusyomo lutukulwaizya kuzumanana kupakamana alimwi akubikka mulimo wakukambauka mubusena bwakusaanguna.—Heb. 10:38, 39.
3. Ino nkaambo nzi ncotweelede kuzumanana kukkomana mukubelekela Jehova?
3 Amukkomane Muli Jehova: Ciindi Gogo wakucisi ca Magogo nayoolwana bantu ba Jehova, lusyomo lwesu luyoosunkwa. (Ezk. 38:2, 10-12) Mazwanga alabaletela buyumuyumu nobaba baabo balangilwa kuzwidilila. Zyakulya zilakonzya kuceya, bantu balakonzya kusweekelwa lubono alimwi buumi bulakonzya kukatazya. Ino tuyoocita buti mapenzi aakutalika? Habakuku wakali kwaalangila mapenzi, aboobo wakakanza kuzumanana kukkomana mukubelekela Jehova. (Hab. 3:16-19) “Lukkomano lwa Jehova” luyootugwasya andiswe kuliyumya mumasunko aaboola kumbele.—Neh. 8:10; Heb. 12:2.
4. Ino ndukkomano nzi ndotukonzya kuba andulo lino alimwi akumbele?
4 Aabo Jehova mbayookwabilila mubuzuba bwakwe bwalubeta bayoozumanana kuyiisyigwa kupona munzila zya Leza. (Hab. 2:14) Abalo aabo ibayoobusyigwa bayooyiya kujatikizya Jehova. Noliba lino, atubelesye coolwe ncotujisi kwaambila bamwi kujatikizya Jehova alimwi amilimo yakwe iigambya!—Int. 34:1; 71:17.