Mulengi Mbwayubununa Zisyomezyo Zyakwe Zyaluyando

Kuzwa ciindi bantu nobakalengwa, Mulengi wesu wakali kubandika abantu kwiinda mubangelo alimwi abasinsimi. Kuyungizya waawo, wakasala kuti mulumbe alimwi azisyomezyo zyakwe zilembwe. Leza usyomezya kuti tuyookkomana kumbele. Aboobo, ino nkuli nkomukonzya kujana zisyomezyo zya Leza mazuba aano?

Mulumbe wa Leza ujanika mu Jwi lyakwe. (2 Timoteyo 3:16) Ino Leza wakababelesya buti basinsimi kulemba mulumbe wakwe? (2 Petro 1:21) Leza wakaambila balembi mizeezo yakwe, mpoonya balo bakailemba. Ncimwi buyo amazuba aano. Ikuti simakwebo wabelesya mulembi wakwe kulemba lugwalo, mubwini simakwebo ngomukamwini lugwalo. Mbubwenya buyo, nokuba kuti Leza wakabelesya bantu kulemba mulumbe wakwe, mubwini walo Ngosikwaanza Malembe Aasetekene.

JWI LYA LEZA LILAJANIKA MUNYIKA YOONSE

Mulumbe wa Leza ulayandika kapati cakuti uyanda kuti bantu boonse baubale alimwi akuumvwisya. Mazuba aano “makani mabotu aatamani” alajanika ‘kumasi oonse, kumisyobo yoonse alimwi akumyaambo yoonse.’ (Ciyubunuzyo 14:6, bupanduluzi buyungizyidwe) Kwiinda mukulongezyegwa a Leza, Malembe Aasetekene nkwaali woonse naa cibeela buyo cangayo mumyaambo yiinda ku 3,000, kwiinda bbuku limbi lili lyoonse munyika.