Sena Jwi Lya Leza Lilembedwe Kuli Mbolyakacincwa?

Bantu banji balalibuzya kuti naa Jwi lya Leza lilembedwe lyakacincwa. Musinsimi Isaya wakaamba kuti jwi lya Leza “linooliko lyoonse mane kukabe kutamani.” (Isaya 40:8) Mbuti mbotukonzya kuba masimpe kuti zisyomezyo zya Leza tiizyakacincwa?

Leza ulijisi nguzu zyakukwabilila Jwi lyakwe alimwi akupa kuti litanyonganizyigwi. Kaindi, ciindi nobakali kulemba kubelesya maanza, basikukkopolola bakali kubikkila maano kubala bbala abbala mumalembe aasalala kutegwa basinizye kuti kunyina cayungizyigwa, cacincwa naa kusiigwa. Nokuba boobo, mbwaanga bantu tabalondokede, basikukkopolola bamwi bakali kulubizya asyoonto, pele ikutali kucinca muzeezo wakali mumalembe aakusaanguna.

INO INGA TWASINIZYA BUTI KUTI JWI LYA LEZA LILIKO MAZUBA AANO LIJISI MULUMBE WA LEZA WAMUMALEMBE AAKUSAANGUNA?

Kuli makkopi manji aamalembe aakaindi aa Jwi lya Leza. Aboobo kuti kkopi yomwe kayiindene asyoonto, ilakonzya kweezyanisyigwa amakkopi aambi kutegwa bazyibe ciluzi. Kutegwa muzyibe zinji, amubone cibalo cakuti “Sena Bbaibbele Kuli Mbolyakacincwa?” icili a jw.org.

Mucikozyanyo, amubone malembe aakaindi aamabbuku aakuvwunga aakazwa mu Lwizi Lutajisi Buumi, aakajanwa mumpangala iili afwaafwi a Lwizi Lutajisi Buumi mu 1947. Malembe aaya alo aakalembwa myaka yiinda ku 2,000 yainda, alijisi zibeela zya Jwi lya Leza. Basyaazibwene bakeezyanisya malembe aaya aakaindi ku Jwi lya Leza ndyotujisi mazuba aano. Ino ncinzi ncobakajana?

Basyaazibwene bakajana kuti izili mu Jwi lya Leza ndyotujisi mazuba aano zilikozyene azyakali mumalembe aakusaanguna.a Kwaalanga-langa cakubikkila maano malembe aakaindi aaya kutondezya kuti nzyotubala mu Jwi lya Leza ngomulumbe wa Leza iwakali mumalembe aakusaanguna. Tulakonzya kuba masimpe kuti Leza walikwabilila Jwi lyakwe ndyotujisi mazuba aano kutegwa kakuli mulumbe uuluzi.

Aboobo tulakonzya kubala Jwi lya Leza katujisi lusyomo lwakuti nzyotubala zililuzi. Katukayeeyede kaambo aaka, lino atulange-lange ncotukonzya kwiiya kujatikizya Leza kwiinda mubasinsimi bakwe.