Amukukkomanine Kukambauka Makani Mabotu

Sena kuli nocakamukatazyide kale kukambauka? Bunji bwesu tulakonzya kwiingula kuti inzya kumubuzyo ooyu. Nkaambo nzi? Ambweni lyoonse inga tulakazyigwa naa kutatambulwa kabotu mucilawo cesu naa ambweni tulayoowa kubandika abantu mbotutazyi kabotu. Masimpe, zintu eezyi zilakonzya kutupa kubula lukkomano. Nokuba boobo, tukomba Leza uukkomene walo uuyanda kuti katumubelekela calukkomano. (Int. 100:2; 1Tim. 1:11) Ino ntwaambo nzi totatwe tweelede kutupa kuukkomanina mulimo wakukambauka?

Kakusaanguna, twaambilizya mulumbe uupa bulangizi. Nokuba kuti bulangizi buyaabumana munyika mazuba aano, tulakonzya kubaumbulizya bantu a “makani mabotu aacintu ciinda kubota.” (Is. 52:7) Pele makani mabotu aa Bwami bwa Leza aalo alakonzya kutupa kukkomana. Kamutanaunka kuyookambauka, amuzinzibale kuyeeya zilongezyo nzyobuyooleta Bwami bwa Leza anyika.

Kabili, makani mabotu ngotukambauka alabagwasya bantu kumubili alimwi akumuuya. Balaiya kuleka micito mibyaabi alimwi akuba aabulangizi bwakupona kukabe kutamani. (Is. 48:17, 18; Rom. 1:16) Tulakonzya kweezeezya kuti tubeleka mulimo wakuyandaula akufwutula bantu. Nokuba kuti bamwi bantu tabayandi kufwutulwa, tulazumanana kuyandaula baabo bayanda kufwutulwa. —Mt. 10:11-14.

Katatu, alimwi kayandika kapati, mulimo wesu wakukambauka ulemeka Jehova. Ulaukkomanina kapati mulimo wesu wakupa bumboni. (Is. 43:10; Heb. 6:10) Kuyungizya waawo, ulatupa muuya wakwe uusalala kutegwa tuuzuzikizye mulimo ooyu. Aboobo, atumulombe Jehova kuti atupe lukkomano, iluboola kwiinda mumuuya uusalala. (Gal. 5:22) Kwiinda mukugwasyigwa anguwe, tulakonzya kukuzunda kulibilika nkotujisi alimwi tulakonzya kukambauka cabusicamba. (Mil. 4:31) Aboobo, tacikwe makani ambobatutambula bantu mucilawo cesu, tuyoozumanana kuukkomanina mulimo wesu wakukambauka.—Ezk. 3:3.

AMWEEBELELE KAVIDIYO KAKUTI AMUJANE LUKKOMANO ALIMWI KWIINDA MUKWIIYA ALIMWI AKUZINZIBALA KUYEEYA, MWAMANA MWIINGULE MIBUZYO IITOBELA:

• Nkaambo nzi ncotweelede kubikkila kapati maano mbotwiiya zintu zyakumuuya, nokuba kuti tulakambauka mawoola manji mwezi amwezi?

• Ino muunzila nzi motweelede kumwiiya Mariya?

• Ino ndilili nomujana ciindi cakuzinzibala kuyeeya Jwi lya Leza?

• Ino ncinzi cimukkomanisya ciindi nomukambauka makani mabotu?