KUPONA BUUMI BWA BUNAKRISTO

Amusale Kabotu Zyakulikondelezya

Nkaambo nzi ncotweelede kusala kabotu zyakulikondelezya? Nkaambo ciindi notusala filimu yakweebelela, nyimbo yakuswiilila, webbusaiti yakulanga, bbuku lyakubala naa cisobano caakkompyuta, inga tusala zintu nzyotuyanda kubikka mumizeezo yesu. Nzyotusala zilatujatikizya mbotulilemeka. Cuusisya ncakuti, bunji bwazyakulikondelezya ziliko mazuba aano zijisi zintu zyasulide Jehova. (Int. 11:5; Gal. 5:19-21) Nkakaambo kaako, Bbaibbele litukulwaizya kuzumanana kuziyeeyesya zintu izimulemeka Jehova.—Flp. 4:8.

AMWEEBELELE KAVIDIYO KAKUTI INO ZYAKULIKONDELEZYA ZILI BUTI NZYONDEELEDE KUSALA? MPOONYA MWIINGULE MIBUZYO IITOBELA:

Muunzila nzi zisobano zyakulwana zyabana Roma zyansiku mozikozyenye azyakulikondelezya zimwi zyamazuba aano?
Ino basimbungano inga babagwasya buti bakubusi kusala kabotu zyakulikondelezya?
Ino lugwalo lwa Baroma 12:9 lweelede kutugwasya buti kusala zyakulikondelezya?
Ino nzyakulikondelezya nzi zili kabotu izijanika kubusena nkomukkala?

SENA NZYAKULIKONDELEZYA IZIJATIKIZYA ZINTU NZYOMULICITILA NOBENI NAA NZYOBAKACITA BANTU BAMWI?

Bunji bwazyakulikondelezya zyamazuba aano ziyiisya muntu kweebelela naa kubala zintu zijatikizya bantu bamwi nzyobacita muciindi cakuti walo kacita zintu zimugeme. Mafilimu, mabbuku alimwi amapulogilamu aa TV atondezya zintu izyakacita muntu uumwi, kutali zintu nzyomwakacita. Nokuba kuti cili kabotu kweebelela naa kubala zintu zijatikizya nzyobakacita bantu bamwi, pele bantu banji bajana kuti cilagwasya kapati kulicitila zintu zyabo. Mucikozyanyo, bantu bamwi balakukkomanina kulizya ziimbyo zyanyimbo naa kuzekaula zifwanikiso. Bamwi balakkomana kucita zyakulikondelezya mbuli kusobana zisobano, kusaya kumulonga naa kuzyana. Kufwumbwa zyakulikondelezya nzyotusala, ‘atucite zintu zyoonse kutegwa Leza alemekwe.’—1Kor. 10:31.