Amuyanzane Abaabo Bamuyanda Jehova

Nkaambo nzi ncotweelede kuyanzana abaabo bamuyanda Jehova? Bantu mbotuyanzana limwi balakonzya kutukulwaizya kucita zintu zili kabotu naa zitali kabotu. (Tus. 13:20) Mucikozyanyo, Mwami Jehoasi wakali kucita “ziluleme mumeso aa Jehova” ciindi naakali kuyanzana a Silutwe wa Bapaizi Jehoyada. (2Mak. 24:2) Naakafwa Jehoyada, Jehoasi wakaleka kubelekela Jehova akaambo kakuyanzana abalongwe babyaabi.—2Mak. 24:17-19.

Mumwaanda wamyaka wakusaanguna C.E., mwaapostolo Paulo wakakozyanisya mbungano ya Bunakristo ‘kuŋanda mpati’ mpoonya bantu bamumbungano wakabakozyanisya ‘kuzibelesyo’ naa zibelesyo zyamuŋanda. Ikuti twaleka kuyanzana amuntu uuli woonse naba munamukwasyi naa wamumbungano uucita zintu zitamukkomanisyi Jehova, nkokuti tuyoozumanana kuba “zibelesyo zyamulimo uulemekwa.” (2Tim. 2:20, 21) Aboobo atuzumanane kuba abalongwe ibamuyanda Jehova alimwi abaabo ibatukulwaizya kumubelekela.

AMWEEBELELE KAVIDIYO KAKUTI AMWIIYE KWEELEBA KUYANZANA ABANTU BATALI KABOTU, MPOONYA MWIINGULE MIBUZYO IITOBELA:

• Muunzila nzi zimwi motukonzya kutalika kuyanzana abalongwe batali kabotu kakunyina kuzyiba?

• Kweelana akavidiyo, ino ncinzi cakagwasya Banakristo botatwe kuleka kuyanzana abantu batali kabotu?

• Ino ninjiisyo nzi zyamu Bbaibbele zikonzya kumugwasya kusala balongwe bali kabotu?