Milimo Mibotu Iitalubwi

Babelesi ba Jehova boonse balakonzya kumubelekela Jehova milimo iinooyeeyegwa lyoonse mane kukabe kutamani. Mbubwenya mbuli muzyali siluyando alimwi uutakonzyi kuluba zintu zibotu nzyobakacita bana bakwe, Jehova takonzyi kuluba milimo yesu alimwi aluyando ndotutondezya kuzina lyakwe. (Mt. 6:20; Heb. 6:10) Masimpe kuti toonse tuliindene kujatikizya zintu nzyotukonzya kucita alimwi abukkale. Nokuba boobo, ikuti twabeleka kusikila mpotugolela mumulimo wa Jehova, tulakonzya kukondwa. (Gal. 6:4; Kol. 3:23) Kwamyaka minji, bakwesu abacizyi banji balikubelekela ku Beteli. Sena inga mwalisungula kuyoobelekela ku Beteli? Ikuti naa nywebo inga tiimwacikonzya, mulakonzya kukulwaizya umwi kucita boobo naa kugwasya muntu umwi wamukwasyi wa Beteli kuti azumanane kubeleka mulimo ooyu waalubazu.

AMWEEBELELE KAVIDIYO KAKUTI MBOMUKONZYA KULIBAMBILA KUYOOBELEKELA KU BETELI, MPOONYA MWIINGULE MIBUZYO IITOBELA:

• Ino ncinzi ceelede kumukulwaizya kubelekela ku Beteli?

• Ino majwi nzi ngobakaamba bamwi kujatikizya zilongezyo nzyobajana akaambo kakubelekela ku Beteli?

• Ino nzyeelelo nzi ziyandika kutegwa umwi ayelele kuyoobelekela ku Beteli?

• Mbuti mbomukonzya kulembela mulimo waku Beteli?