Cikwati Taceelede Kumana

Zikwati zya Banakristo izizwidilila zilamulemeka Jehova akuleta lukkomano kuli banabukwetene. (Mk. 10:9) Kutegwa cikwati citakamani alimwi kacili calukkomano, Banakristo beelede kutobela njiisyo zyamu Bbaibbele ciindi nobayanda kusala muntu wakukwatana limwi.

Ncabusongo kutalika kweebana amuntu uumbi lilikke buyo kuti ‘mwainda kale aciimo cakukubuka,’ iciindi mizeezo yamuntu noinyongene akaambo kakuti ulombozya kapati koonana. (1Kor. 7:36) Nomutanakwata naa kukwatwa, amubelesye ciindi eeco kuyumya cilongwe canu a Leza alimwi akuba abube bwa Bunakristo. Mwacita oobo, muyoopa kuti cikwati canu cikazwidilile.

Kamutanazumina kukwatwa, amusolekesye kuzyiba “muntu wamukati kamoyo.” Nomucita oobu tamweelede kubinda, nkaambo citola ciindi. (1Pet. 3:4) Ikuti mwatalika kumudooneka muntu uuyanda kumukwata, amubandike anguwe. Mbubwenya mbocibede amuzilongwe zimwi, mucikwati mweelede kubikkila maano kuzintu nzyomupa kutali buyo nzyomulangila kutambula. (Flp. 2:3, 4) Ikuti kamutobela njiisyo zyamu Bbaibbele kamutanakwatwa, ciyoomuubila kucita oobo mwaakukwatwa calo ciyoopa kuti kamukkomene mucikwati.

AMWEEBELELE KAVIDIYO KAKUTI KULIBAMBILA CIKWATI—CIBEELA 3: AMUZYIBE ZIJATIKIZYIDWE, MPOONYA MWIINGULE MIBUZYO IITOBELA:

• Ino cisyabo camucizyi a Shane cakali buti?

• Ino wakabona nzi naakatalika kumuzyiba kabotu Shane?

• Ino bazyali bakwe bakamugwasya buti, alimwi nkusala nzi kwamaano nkwaakacita?