KUPONA BUUMI BWA BUNAKRISTO
Amwiiye Kutegwa Muzyibe Mbwayeeya Leza
Tuyanda kukkomanisya Jehova muzintu zyoonse nzyotucita. (Tus. 27:11) Kutegwa tucite oobo, tweelede kupanga zyakusala zitondezya mbwayeeya nokuba kuti kunyina mulawo uugaminide uukonzya kutusololela. Ncinzi cikonzya kutugwasya kucita boobo?
Amuzumanane kuba abubambe busitikide bwakubala Bbaibbele. Lyoonse notubala Bbaibbele, cili mbuli kuti tubandika a Jehova. Tulakonzya kwiiya kujatikizya Jehova mbwayeeya, kwiinda mukubona mbwaakali kubeendelezya bantu bakwe alimwi akulanga-langa zikozyanyo zyabaabo bakacita kabotu naa zibi mumeso aakwe. Aboobo, ciindi notuyanda kusala kucita cimwi, muuya uusalala ulakonzya kutuyeezya ziiyo ziyandika alimwi anjiisyo nzyotwakaiya kuzwa mu Jwi lya Leza.—Joh. 14:26.
Amuvwuntauzye. Ciindi nomuyanda kupanga cakusala, amulibuzye kuti, ‘Ino ntupango nzi naa nzibalo nzi zyamu Bbaibbele zikonzya kundigwasya kumvwisya Jehova mbwalimvwa mumakani aaya?’ Amulombe lugwasyo lwa Jehova, alimwi akubelesya zibelesyo zyakuvwuntauzizya ziliko mumwaambo wanu zikonzya kumugwasya, kutegwa mujane njiisyo zyamu Bbaibbele zikonzya kubeleka mubukkale bwanu.—Int. 25:4.
AMWEEBELELE KAVIDIYO KAKUTI TWEELEDE ‘KUBALIKA CAKULIYUMYA’—KAMULYA ZILYO ZIJISI BUSANI, MPOONYA MWIINGULE MIBUZYO IITOBELA:
Ino mbuyumuyumu nzi mbwaakajisi mucizyi uuli mukavidiyo?
Ino inga mwazibelesya buti zibelesyo zyakuvwuntauzizya kutegwa zimugwasye kulwana buyumuyumu bukozyenye?
Ino tugwasyigwa buti ciindi notuba aciindi cakuvwuntauzya alimwi akucita ciiyo cesu zyalo zikonzya kutugwasya kusala kabotu?—Heb. 5:13, 14