Mbomukonzya Kugwasya Nokwacitika Ntenda

Ntenda zilicitikila ziyaabwiindila buya mazuba aano. Ciindi noyacitika ntenda, kuyandika bubambe bubotu alimwi akubelekela antoomwe kutegwa kupegwe lugwasyo. Akaambo kaceeci, bamu Kabunga Keendelezya babikka bubambe bwakuti mumitabi yoonse kube dipatimenti ya Disaster Relief.

Ciindi bakwesu bamu dipatimenti eeyi nobamvwa zyantenda, mpoonya-mpoonya batumina baalu bakubusena ooko kutegwa bazyibe lugwasyo ndobayandika basikumwaya. Ikuti ntenda yacitika yanyonyoona kapati cakuti basikumwaya inga baalilwa kuligwasya, bakumutabi bayoosala bakwesu beelela kuti basololele mulimo wakugwasyilizya. Bakwesu aaba balakonzya kulomba basikulisungula naa zyakusanga zigaminide, naa balakonzya kuula alimwi akutuma zintu ziyandika.

Kuli bubotu bunji buliko bwakucita zintu munzila eeyi. Ikuti bakwesu tiibatobela bubambe oobu zintu zilakonzya kunyongana, mbuli kwiinduluka kucita mulimo ngoonya, manyongwe, kunyonyoona mali alimwi azibelesyo.

Bakwesu basalidwe amutabi balakonzya kubona mali aayelede kubelesyegwa alimwi abasikulisungula bayandika kugwasyilizya. Kuyungizya waawo, balakonzya kubelekela antoomwe abamfwulumende, balo bakonzya kutugwasya kutegwa mulimo ucitwe cakufwambaana. Aboobo tamweelede kubwezelela mali, kutuma zintu, naa kuunka kubusena kwacitika ntenda ikuti tiimwalombwa kucita oobo.

Nokuba boobo, ciindi nokwacitika ntenda tulayanda kugwasya. (Heb. 13:16) Kayi tulabayanda bakwesu! Ino inga twagwasya buti? Cintu ciyandika kapati, nkubapailila aabo bajatikizyidwe alimwi abaabo ibatola lubazu mukupa lugwasyo. Kunze lyaboobo, tulakonzya kusanga kumulimo wanyika yoonse. Kwiinda mukusololelwa a Kabunga Keendelezya, bakumaofesi aamutabi mbabakonzya kuzyiba mali mbwakonzya kubelesyegwa kabotu. Alimwi ikuti naa tuyanda kutola lubazu mumulimo ooyu cacigaminina, tulakonzya kulemba foomu ya Local Design/Construction Volunteer Application (DC-50).

AMWEEBELELE KAVIDIYO KAKUTI KUPAYA KWAMAANZI KU BRAZIL, MPOONYA MWIINGULE MUBUZYO UUTOBELA:

Ino ncinzi camukkomanisya kujatikizya mulimo wakugwasya wa Bakamboni ba Jehova nokwakali kupaya kwamaanzi ku Brazil mu 2020?